مين اللى قال ان الزمان بنا غدار !!
يسيبك لوحدك فى عتمة المشوار
او انه يكدب عليك بهمس مزوق
ان الليل بكره ويانا ميعرفش نهار
مين اللى قال ان مفيش لنا معيار !!
الانسانية شتا عمرنا غنيه بامطار
شمسية الانسانية تحتها عايشين
الكل يشهد اننا بالامل فى انصهار
مين اللى قال ان الزمان بنا اعذار !!
الحيرة جواك عايشة مع الاسرار
اذا خرجت منك لفاقد التربية ندل
بقت خنجر يخونك حتى فى هزار
مين اللى قال ان الزمان لنا مرار !!
والواد الفهلوى يبقى سيد الكبار
الرزق يتعطر بالعرق دايما منك
الكسل يبقى دموع والزمن دوار
مين اللى قال ان الزمان بنا طيار !!
ابن الاصول ضد المحن لك جدار
ياما غيره فى سكة الزمان سقط
غربال الزمن يكره فينا كل عوار
مين اللى قال ان الزمان بنا بحار !!
ياخد منك المقداف غدر فى فرار
اوعى تصدق كل كلام يتقال عنه
الزمان رحلة حب متعرفش فجار
قال الزمان للامل العرق بنا بشار
نحصد الخير وتانى تزهر الازهار
ودورة الزمان فى عروقنا بدايه
مالهاش نهاية والامل بنا أشجار
تم أضافة تعليقك سوف يظهر بعد المراجعة