صورة جواهم حزن ووجع سنين...
دمعه يتيم بيدور على الأمان...
دمعه فقير قسى عليه الزمان..
حرفين مليانين جرح وأهات...
من صرخة مظلوم بينادى...
عن حقه اللى ضاع...
وعمره اللى فات...
عن قلب مكسور ...
بيصرخ ويقول الآه...
عن جرح محفور...
تايه ف بحور الحياه...
وآه منك يا دنيا آه...
عن طفل كان عايش فى بيت قلبه فرحان وسعيد...
بأيد اهله بقى ف الشارع وحيد...
سألته مالك؟
قالى ابويا وأمى سابو بعض ...
كل واحد عاش ف بيت غريب...
ولقيت نفسى ف الشارع ...
كانوا ليا كل حاجه كنت ليهم انا الحبيب....
ودلوقتى نسيونى مبقاش ليا غير صوت الآه اللى طالع....
عن أم فضلت تربى وتسهر الليالى...
ولما احتاجت لأولادها كل واحد قال انا مالى....
شالتهم جوه عينيها...
كانوا هما الامل ليها...
ولما كبرت والمرض زاد عليها...
قالتلهم يا أولادى محتجالكم ساعدونى...
بعدوا وقالوا همومنا مكفيانا...
وف دار مسنين يا ناس ودونى...
وقالولى مش هينفع تعيشى معانا...
وبقيت أقول آه يا اولادى كسرتونى..
سهرت وتعبت وبأيديكم وجعتونى...
آه يا دنيا آه....
لما بنت مكملتش العشرين...
جوزوها ...قالوا خلاص كبرت القطر هيفوتها...
فضلت تبكى وتقول اروح لمين..
محدش سامع صوتها...
اهلها باعوها قالوا الجواز ستره...
مش عارفين أن حلمها تكمل تعليمها..
عندها حلم لبكره....
بس تقول لمين ....
مفيش بأيديها حاجه...
ومهما قالت ...
ومهما دموعها سالت...
احنا ف مجتمع الكل فيه ورا عادات قديمه ماشيين...
وآه يا دنيا آه...
عن مريض مش لاقى سرير...
ذنبه ايه ؟ آه عشان فقير...
طيب ليه نشوفه بيتألم ونسكت...
ماهو مش بيتألم من مرضه بس...
عينيه مليانه بالدموع وبرضه بيسكت..
يمكن فى يوم الناس ترجع تحس...
فقير مش لاقى اللقمه...
ولما بيتعب مش بيلاقى الحقنه...
بيرمى حموله على الله...
مفيش غيره بيحس بيه...
وآه منك يا دنيا آه...
ليه رب وحده هيشفيه....
مالك يا دنيا جايه ليه علينا؟
حسى ولو مره واحده بينا...
اعرفى هم كل واحد فينا وحاولى تداويه...
مش يمكن تكونى انتى السبب فيه...
او يمكن يكون جرح زمان دوستى عليه...
آه منك يا دنيا آه...
تم أضافة تعليقك سوف يظهر بعد المراجعة