فيسبوك
واتساب
بلياتشو راجع من شغله
مسكين مش شايف قدامه
دة حتى مش شايلاه رجله
تعبان بيقاوح ف آلامه
ويدوب اتغدى وراح تنبل
اصل مراته اكلها يهبل
اه يا طعامته
شاطرة مدامته
واستاذن قال ايه هيقيل
و يدوب ف النوم نعست عينه
راح قام مفزوع
الجار قال ايه الله يعينه
شباكه مخلوع
و اهو نازل دق
حاجة تزهق
و كمان النوم اهو بقى ممنوع
و الشارع دوشة كمان برضو
منها مسلمش
و كأن الازعاج بيطارده
علشان مينامش
واحد بينادى يقول يا كرنب
و الواد ميدو بيفرقع بمب
و خناق و زعيق
حاجة اخر وش
و كمان واحد ماشى يخبط
بيقول انابيب
وتكاتك رخمة بتستعبط
بتقول بيب بيب
واحدة تزغط
عيل عيط
و حمار بينهق على صوته
بتقوم زعابيب
بس يا عالم نفسنا نرتاح
اهدوا شوية
دى الدنيا تعب و مرار وكفاح
ناقصاش هي
وهتعمل ايه بس يا بليا
حتى التعسيلة بقت غالية
لما تموت بقى يمكن ترتاح
