علموهم
علموهم عشان يطلعوا أسوياء مش معقدين...
علموهم عشان يطلعوا ناضجين...
علموهم عشان ميبقوش مجروحين...
علموهم يكونوا بنى آدمين...
*علموهم أن المحبة فعل مش كلام..، والأهم، حسسوهم بالحب...
خلوهم يشبعوا بالحب فى البيت عشان ميخرجوش يدوروا بره ويرخصوا نفسهم...
*علموهم أن المحبة عمرها ما تكون مشروطة، وأنهم محبوبين زى ما هم،
متخلوهمش يتعلموا يلبسوا وشوش عشان يبسطوكم، ومع الوقت يبقوا مشوهين.
*علموهم أن مش مقبول أنهم يقللوا من حد حتى لو على سبيل الضحك والهزار...
فهموهم أن الكلام ساعات كتير بيجرح أكتر من الفعل.
*علموهم يحلموا حتى لو الحلم كبير، بلاش تخنقوهم وتموتوا الحلم...
خلوهم يصدقوا أنهم يقدروا، بدل ما يطلعوا شايفين نفسهم صغيرين.
*علموهم أن الفشل جزء من النجاح...علموهم أن مش لازم تطلع الأول عشان تكون ناجح...
فهموهم أن النجاح والقيمة مش رقم فى شهادة.
*علموهم أن قبول الخسارة أو الهزيمة هو جزء طبيعى من الحياة...
فهموهم أننا بشر بنضعف ونيأس لكن بنكمل.
*علموهم يجربوا ومايخفوش، الحياة فيها حاجات كتير بره الدايره بتاعتهم...
ساعدوهم يطلعوا بره الدايرة ويشوفوا الدنيا بشكل مختلفة.
*علموهم يختاروا ويتحملوا مسئولية اختياراتهم، خافوا عليهم بس بلاش تبنوا عندهم اعتمادية تكسرهم بعد كده فى حياتهم.
*علموهم يعتذروا لو غلطوا...فهموهم أن الاعتذار مش هيقلل منهم، بالعكس هيكبرهم..،
خلوهم يشوفوا ده فيكم، بلاش كبرياء.
*علموهم يطلبوا المساعدة لو محتاجين ومايكابروش..،
عادى أننا نضعف أو نكون مش عارفين..، وأن اللى مش عادى أنى أكون فاكر نفسى عارف وفاهم كل حاجة.
*علموهم أنهم مش محور الكون وأن كل أحلامهم وطلباتهم مش لازم تتنفذ، علموهم يقبلوا كلمة لأ ويكملوا ومتبقاش نهاية العالم.
*علموهم أن "لأ" مش عيب ولا قلة أدب، فهموهم أنه عادى يقولوا "لأ" لأى حاجة مش عايزينها أو شايفينها بتضرهم،
بدل ما يكونوا منساقين ورا كل حاجة وأى حد.
علموهم وافضلوا علموهم، خليكم ضهرهم وسندهم !
علموهم وقبل ما تعلموهم علموا نفسكم !
تم أضافة تعليقك سوف يظهر بعد المراجعة