١- زى ماتش النيجر...قبل الماتش الناس انتقدت التشكيل واستغربت ثلاثية وردة والننى وغزال...لكن الحقيقة أجيرى بيواصل الخداع وبيوظف غزال توظيف ولا أروع...غزال هو تالت فى نص الملعب فى 4 3 3 أثناء الدفاع...والتالت فى قلب الدفاع فى 3 4 3 أثناء الهجوم.
٢- أجيرى أثناء الدفاع بيلعب 4 3 3 كلاسيكية لكن مع تطبيق ضغط عالى قوى شرس عن طريق مروان وتريزيجيه ووردة والننى و غزال.
٣- أثناء الهجوم غزال بينزل بين عمرو طارق و باهر اللى بيفتحوا عرض الملعب و بيسلموا الكورة لوردة و الننى اللى بيبقوا صناع لعب متأخرين.
٤- تنوع كبير بيحصل فى جبهات الهجوم و مناطق صناعة اللعب...زيادة عددية كبيرة جدا بيعملها أجيرى جوة منطقة جزاء المنافس لما الجناحين صلاح و تريزيجيه بيضموا جنب الفرود ف القلب و الظهيرين المحمدى و ايمن بيكملوا فى مراكز الأجنحة...و بالتالى منطقة صناعة اللعب الأساسية عند أجيرى هى الأطراف مع عمل زيادة عددية جوة المنطقة.
٥- رغم توجيه مناطق صناعة اللعب للأجناب لكن أجيرى مالغاش صناعة اللعب من العمق...أجيرى استغل مهارة و رؤية صلاح فى إنه يسرق المدافعين و ينزل فى مركز 10 يستلم الكورة و يقوم بدور صانع اللعب الكلاسيكى من العمق...و بصراحة صلاح صنع عدد مهول من الفرص لزمايله بالحركة دى فى مباراتى النيجر و إى سواتيني.
٦- أجيرى زى ما وظف غزال توظيف رائع...هو كمان وظف صلاح توظيف أكتر من رائع و استفاد بكل إمكانياته...جناح اثناء بناء الهجمة...فرود لما الهجمة توصل للتلت الأخير...صناعة لعب من مركز ١٠ لو لزم الأمر فى حالة أن الأجناب اتقفلت...انهاردة مكانش فيه باصى لصلاح...كان فى باصى يا صلاح.
٧- نقدر نحدد شوية ملامح من خصائص فكر أجيري...بيحارب على الاستحواز و الضغط العالي...بيعمل كثافة عددية هجومية و دفاعية على الأطراف لكن مانسيش العمق...لو دفاعيا الفريق احتاج من غزال إنه يقوم بدور مركز 6 بيعملها...و لو هجوميا الفريق احتاج من صلاح إنه يقوم بدور مركز 10 بيعملها.
٨- بمساعدة من صلاح...أجيرى فى طريقه إنه يرجع الثقة لمهاجمى المنتخب فى إنهم ممكن يوصلوا للجول كتير و يهدفوا...واحدة واحدة لو أجيرى نجح ف النقطة دى و التهديف مبقاش مقتصر على صلاح منتخبنا هايروح لمستويات أعلى بكتير...كوبر كان مخلى التسجيل مقتصر على صلاح...لما احتجنا باقى اللاعبين فى كاس العالم محدش سجل.
٩- برغم التسجيل...تريزيجيه مع منتخب مصر بيفقد تركيزه بشكل رهيب قدام الجول...نفسى يلعب السهل و مايحاولش يثبت إنه مهم زى صلاح لأن 90 % من جمهور مصر مقتنع أن تريزيجيه لا يقل أهمية عن صلاح.
١٠- مروان أفضل كتير من الماتشات اللى فاتت و أداؤه فيه انسيابية كبيرة.
١١- الاستراتيجية اللى لعب بيها أجيرى انهاردة هجومية بشكل كبير...قدام الفرق الكبيرة الاستراتيجية دى ممكن تنفع مع لمسات بسيطة...الظهير العكسى مايزيدش اثناء الهجمة...و الننى و طارق اللى يلعب مكان وردة يلعبوا تحت الكورة دايما أيا كان مكانها ف الملعب.
١٢- النيجر و إى سواتينى مستواهم ضعيف؟؟ طبعا...لكن ياما عانينا مع كوبر قدام الفرق الضعيفة لأنه مش بيستغل ضعفهم و بياخد بإيديهم و يدخلهم الماتش.
١٣- لو استمر أجيرى فى توظيف اللاعيبة بالأدوار دي...يبقى لازم تحصل شوية إضافات...أحسن واحد ممكن يقوم بالأدوار اللى كانت مطلوبة من أحمد المحمدى هو حسين الشحات و بعده عمر جابر...أدوار أيمن أشرف يقوم بيها محمد حمدي...أدوار على غزال يقوم بيها حسام عاشور...أدوار مروان يقوم بيها صلاح محسن.
١٥- الننى مع أجيرى غير الننى بتاع كوبر خالص.
١٦- أجيري...مدرب جهز شغل و اشتغله ف التمرين و تعب فيه و حفظ اللاعيبة تحركات جديدة عليهم و جمل هجومية جديدة عليهم...بحترم جدا المدرب اللى بيشتغل ف التمرين و شغله يبان ف الماتش...لكن ماينفعش أبدا يسكت على اللى حصل ف الشوط التاني.
