نيرة الإمام تكتب: ضحكات مؤلمة

بتضحك بس من ورا  قلبك لأنه كان بيحب يشوفك بتضحك

بس مبتنساش لحظة حبك ولا بتعيش إلا بروح سكنت روحك

بتعيش من غير حبك بس راضى ومضطر وتنفذ كلامه وتعيش

حبيبى ساكنه بين ضلوعى أنفاسك والدنيا بعدك فعلا متساويش

دايما عايشه بروحك جوايا ملينى حبك وفاكراك

مدفينى إحساسك بتصبر بذكرى اللى عشته معاك

مسبتش مجال لغيرك مفيش فى رجولتك مستحيل هنساك

لا قبلك ولا بعدك ولا بتمنى غير إنى أجيلك دايما وألقاك

فاضى مكانك مستحيل بغيرك يتملى

مفتقده الأمان يا اللى بحنانك غمرتنى

عايزه أشم ريحتك وأطمن فى حضنك وحشتنى

بقيت بخاف بعدك بقى الهوى الطاير بيهزنى

محتجالك عايزاك عايزه أعيش معاك وحشتنى

محستش اى حاجه حلوه غير منك ولا غيرك همنى

أنا اللى أضعف من إنى أعيش من غيرك وجع قلبى بعدك هدنى

حاسس بيا ساكن فيا بتطمن عليا حتى وإنت هناك روحك بتودنى

عرفت معنى اليتم بعدك عوضتنى عن كل اللى راحوا

رحتلهم بدرى وسبتنى قلبى بعدك غرقان فى جراحه

أنا اللى مقدرتش أعيش من غيرك يا حبيبى

أنا اللى شاعله نارى وقايد جوايا لهيبى

أنا اللى البعد عذبنى  وكوانى الزمان

أنا اللى بعدك اتحرمت من الحب والحنان

محتاجه لمسه إيدك ونظرات بتدينى الأمان

صوت قلبك وتنهيدك مشتاقه لكل اللى كان