إحساسك إيه وإنت بعيد دلوقت
شايفك شايل الساعة بتحسب وقت
خايف الغربة؟
اسمع منى واشهد إنى نصحت
الانسان فى الدنيا زى المركبة وسط البحر
والريح الزايد عن حده بيخلق دوامة
بتسحب دايما
كل الجاى فى طريقها لتحت
عافر سحب الريح العالى
وصاحب نسمه لحد ما توصل بيك الشط
خايف الغربة؟
تبقى ف أول خطوة فلحت
وإن كان ع الناس مابتتغيرش
الناس بتشكل أخلاقها على حسب الظرف
وفيه حاجات فى الدنيا أما بتحصل مابتتفسرش
شايف الغربة معلمه فيك وكإنك غايب دهر
وإنت يادوب بتخطى برجلك 20 يوم من أول عتبة لشهر
أمك سألت عنك وأنا بإرادتى سرحت
خوفت أقولها إن حزنك فاض وطفحت
قلت تمام مبسوط ونجحت
فضلت تحكى لربنا عنك وأنا وياها فرحت
حلوة دبى ندهك برج خليفة ورحت
خليك فاكر واشهد إنى يا أخويا نصحت
عايز ترجع؟ .......إرجع سهل
عايز تمشى تجرب جرب
بس الغربة طريق مش سهل
ومادمت نويت الغربة اتغرب
باب ربنا مفتوح مش سد
قرب منه سبح باسمه
لحد ما تتعب إيدك من تسبيحك عَد
وربك بينا وبينه عهود
وربنا عمره ما يخلف وعد
