حاجه غريبة جدا تلاقى الواحد قاعد متمزج ومتسلطن بيسمع أم كلثوم ويا سلام لو معاها كوباية شاى مضبوط والله الله لو قاعد فى بلكونة أو جنينة....الله عليكى ياست هو دة المزاج هو دة الكلام الحلو أدى الرومانسية ولا بلاش يامين يرجع زمان وأيام زمان قول للزمان ارجع يازمان وفجأة.... أن ااااااااان يظهر على شاشة التليفزيون شيخ أزهرى بيغنى لأم كلثوم.... أوبااااااا قامت الدنيا ولا قعدتش راحت الرقة وراحت الحنية فينك يارومانسية !!!!! يتحول الجدع بقدرة قادر لمارد جبار عاوز يضرب الشيخ بالحديد والنار وهاتك يا شتيمة وطاخ طيخ طوخ.... جرى إيه يا حاج يا حجوج هو فية إيه؟ هى أم كلثوم حرام ؟! طب بتسمعها ليه؟ ما هى لو حرام أهو حرام عليك وعلينا ولو حلال أهو حلال ليك ولينا ولا سيادتك محلل لنفسك ومحرم علينا ؟! ما أنت ليل نهار أم كلثوم والعيال وأمهم هات يا رقص ويا أغانى هابطة وصاعدة .... ما تسيب الراجل يفرح شوية زيك ولا يفك عن نفسه مالك أنت وماله ؟! يقوم البيه مكشر وفارد ظهره على الآخر ويقولك أصله شيخ والمفروض ... بس عندك يا عم الحاج ما تكملش، مين اللى قال المفروض ومين اللى فرض ؟ مين اللى يحاسب ؟ .... إحنا كلنا ربنا واحد اسمة الكريم الرحيم هو اللى يحاسبنا ويغفر لنا ويرحمنا برحمته ..... مين أداك الحق تحاسب وتعاتب وتجلد بلسانك الشيخ الكفيف علشان عمل حاجة أنت بتعملها .
اتقوا الله وحاسبوا أنفسكم قبل أن تحاسبوا الناس
تم أضافة تعليقك سوف يظهر بعد المراجعة