مليش ف اللف والدوران
ولا بعرف أدارى إحساس
ولما أغلط
بقول معلش
م بتكبرش على
كلمة أنا غلطان
بحب الخير لكل
الناس بلا استثناء
بلا تفريق
ف وقت الشدة
تلقانى أعز صديق
ف وقت الضيق
بداوى الجرح
بحب الفرح
والنكتة
وأحب الصحبة
واللمة
وصاحبى
ف غربة
أحسن لى من
ابن الخالة والعمة
بحب بصمت
وأرد بصمت
على قلبى
اللى م بيهداش
وبزعل لما
أشوف واحد
يعوز حاجة
وم يطولهاش
بحب المغنى
والمواويل
وأحب النقشبندى
أسمع
وبسمع مدحه
للهادى
يقول الابتهال
فأسرح وهو بيدعى
وينادى
بحب أسمع منير وغناه
ونعناعه اللى ف جنينة
ويحلالى غنى كاظم
أغانى طيبة زينة
بحب أقرأ لصلاح
جاهين
وعجبى من كتاباته
بيرسم ضحكته ف جرنال
يلون بيها أوقاته
بحب أسمع
حكاوى زمان
من العواجيز
وبلقى الحكى
يطربنى وفيه
تحفيز
بقرش تجيب
حاجات يامه
شوال القمح
فيه بركة
يأكل عيلة
وبيفضل
وناس بتحب
بعضيها بدون
تمثيل بدون
مصلحة
وبينيمها أدان
العشا وبيصحيها
صوت الرحا
بيحترموا الكبير
والصبى بلا تمييز
م بين أعمار
بحب ألمح سما
صافية
وأشوف الشمس
بتنور
غيطان الخضرة
والأشجار
وأحب أسمع أنين البحر
من كتمانه للأسرار
بحب أكتب وأقول إحساسى
ف كتابتى و ف الأشعار
أنا فكرة بتتفرع وفجأة
بتنتشر أفكار
أنا كلمة أنا إنسان
بحس بهم كل الناس
وبالغلبان
ولما ادفى ف عز البرد
بيسرى ف قلبى حسرة
وحزن
وأفكر ف اللى ساعتها
ف عز البرد بات بردان
أنا إنسان ف قلبى خيوط
من الألحان
بتنسج توب من الأحلام
وحلمى فيوم بيبقى حرير
وأحيانا يكون كتان
أنا إنسان
حياتى زى حلم كبير
وهوا بيتملى تفاصيل
ولو هحكى وأقول عنى
هتلقوا بإن حكيى طويل
حياتى زى قصيدة شعر
وبهديها لأعز الناس
م بعرفشى أدارى إحساس
مليش ف اللف والدوران
