عاشت بيادتك فوق رقاب أعاديك
مصري ابن طينك والتراب ف إيديك
واقف لا همّك مين هيطلع فين
ولا حد غيرك يوم سكن أراضيك
.......
عاش الشهيد ابن بطن الحاره والسرداب
رافع إيديه بالعلم ع السونكي للإرهاب
ف عنيه حبيبته وملامحه النيل وقلبه نياب
بيعضّ بيهم إذا ما اتمكّنوا الأغراب
......
صليت عشانك يا صاحبي وضحكتك محراب
ولعنت كلّ اللي خانك يوم في كلّ كتاب
أنت اللي -صوتك برغم الموت مزلزلني-
وانت اللي نزّلني من غيبوبتي بعد غياب
...........
الله عليك والملايكه بيغسلوا هدومك
والجنّه فرحانه فوق يا صاحبي بقدومك
الله على مصر فيك... مصر اللي نعرفها
مصر اللي قالت: بطل علشانها من يومك
.................
يا دم مصر المبعتر
................. ع الرصيف أصناف
يا حضن مصر المجمّع
......................... كافّة الأطياف
يا قلب مصر المعذَّب
................... يا اللي لفّ وشاف
يا نيل يا صوت الغلابه
..................... يا وردتين ولحاف
الموت على سكّتك
................... شايل معاه خُطّاف
الموت على سكّتك
.................... شايل معاه منجل
الموت على سكّتك
........................ عمّال بيتحنجل
الموت على سكّتك
..................... طايح بدون إنصاف
يا نيل يا حصن الغلابه
...................... يا ساحة السيّاف
يا مأوى للي اعترف
.......................... يا ملجأ العرّاف
شايلين علمنا وإمامنا الأرض والساحه
....... فلاح وطالع يجمّع مهر فلاحه
جعانين وضحكة أراضي الغاليه تفاحه
ودموعها كوثر وفرحة روحها عيش وخشاف
وعشان كده ف حضنها
..................... بنموت بدون ما نخاف
........
يحيا الشهيد اللي نفّذ أمرها بالحرف
وصمد ف وشّ الرصاص من غير ما يرمش طرف
داخل بصدره ف غمار المعركه بيضحك
والغير بيصرف ف كلّ اللي اتمنع م الصرف
............
صلّيت عشانك وكانت ضحكتك تسابيح
ومسحت وشّك وغنيت لك كلام تفاريح
...... يا قلب شايلاه ملايكة ربنا لهناك
وعنيه بتهتف بمصر ف وشّ كل قبيح
............
يا بلاد ولسّه الولاد ع الجبهه وبتدّي
يا قلوب مازالت وقالوا القلب بيصدّي
يا مصر بطنك شباب بتجيب وبتودّي
يحيا اللي قال للعيال أيام وهتعدّي
........
عاشت بيادة مصر فوق راسهم
محميّه بينا ودايسه أجعصهم
أبانوب ومينا وحسن وحسين وعبواحد
الكل واحد ولو واجهونا نفعصهم
الشاعر سعيد شحاتة
عدد الردود 0
بواسطة:
اتقوا الله
ربنا يرحمه و يرحمه الجميع
مفيش حد غالى على رب العباد و لقد حرم الاسلام الرثاء!!!! اتقوا الله