فيها حاجة حلوة دايما ميزتها
استحالة تكون أنوثة من مَفيش
هى كُتلة
من مشاعر صادقة دايماً جوة بيتها
هى طَلسم للحياة ما بينتهيش
تبقىَ بيضة تبقىَ سمرة
تبقىَ مَعجونة مُغامرة
تبقىَ عاشقة للمؤامرة
بس ف الآخر بـ يغرق
فيها فارس
يرتوى ف القرب خمرا
هى ثورة أو مناورة
بين جيوش الحُسن فيها من زمان
هى توليفة عَجيبة
هى قسوة هى طيبة
هى معروفة غريبة
سحر يتخطى حدودها والمكان
وحدها بتمد كل الكون ضِياه
هى جاه
هى شىء تحتار تحدد رؤيته
بس معروف الاتجاه
هى تاج فوق قلب عاشق
هى قِبلة للحياة
هى حرف بـ مفردُه
هى كلمة والكتاب
هى مجموعة عذاب
بحر هى فيه سفينة
ماشيه بـ تشُق الضباب
هى سجن ف قلب عاشق
بس ليها ألف باب
هى مجنونة وعاقلة
هى مجموعة معاني
هى مسئولة وسائلة
هى أعجوبة زماني
هى حالة كتير فريدة
شىء ومليان بـ الأماني
هى أسطورة وحقيقة
حُضن دافى وقت ضيقه
ساعة ظالمة أو بريئة
تبُدر الأفراح ما بينا
تطرح الخير بـ الدقيقة
هى كوكب أو مَجرة
لو تشوفها ألف مَرة
مش هـ تقدر يوم تفارق
أصل طعم الفُرقة مُرة
عايشة فينا حلم لينا
بس مسجونة وحُرة
هى فرحانة حزينة
هى بـ تضلل علينا
عِطر ماشى بينا دايماً
قلب عايش بس لينا
هى واحة وسط صحرا
هى جنة وسط نار
هى غلبانة وقادرة
هى ليل بَعدُه نهار
حُضنها أجمل حِصار
بُعدها لو طال علينا
نلقىَ كل الكون دمار
مصر هى الأُنثى ديه
الضعيفة والقوية
مصر هى النبض دايماً
مصر مفتاح القضية
مصر هى الانتصار
تم أضافة تعليقك سوف يظهر بعد المراجعة