فِكرك يعنى
لو راح تبعد ليك هـ توضىَ
أو أتشعلق
وسط مراكب ماشيه ف قلبك
أو أتخطى حُدود العقل
فِكرك تقدر يوم تمنعنى
أو كلمة شوق هـ ترجعنى
وانسىَ طريقتك أو أسلوبك
أصل الأمر ماهوش بالسهل
مش قايله لَك
بُكره هـ تندم أو تتنمنىَ
ف لحظة تشوفنى
زى أغانى كتير بسمعها
لكن واثقة
إنك لازم تكره نفسك
وتقول فرصة ضاعت منى
وتلوم قلبك ليه ضيّعها
يومها هـ تعرف
كل دهائك ولا ذكائك
جهل ف جهل
كنت بحاول أرسم ضِلة
يوم تجمعنا ف قلب الشمس
كنت الملجأ وقت الحاجة
بس ما كنتش بيا تحس
كل جوارحى عايشة عَشانك
وأنت كتير على غيرى تبُص
ما اهتمتشى غير بـ غرورك
قولت مفيش غير نفسى و بس
فاكر لما إيديك تلمسنى
لو بـ الصدفة بـ يحصل إيه
كل ما فيا يدوب ف كيانك
لكن كنت بـ تضحك ليه؟
و بـ تستهتر لما اتكلم عن أحوالى
واما أعاتبك بـ تعنّفنى
وأن شىء ناسبَك بـ تعديه
ليه ما فهمتش قلبى بسرعة
ليه ما قدرتش تِخلص ليه
لو ما كانتشى العيشة ف قربى
مكسب ليك ويمدك شوق
يبقى وجودك جنبى خسارة
بُكره أكيد م الغدر تدوق
كنت حقيقى نُقطة ضَعفى
لسه بحاول منها أفوق
لسه هتعرف قيمة حُبي
لما الدنيا ف يوم هـ تروق
مش ندمانة عليك لو ترحل
مش مصدوم غير قلبى العاشق
لا انا هـ توجع أو يوم هـ خجل
و لا هـ يسامحك قلبى الصادق
لو تتأسف أو يوم تسأل
لازم أبعد لازم افارق
قلبى ماهوش محتاج أفضالك
قلبى ماهوش محروم و لا سارق
أنا هـ تجاهل كل كلامك
أصل كلامك ما لهوش رد
صُلحك كان صوره لـ خصامك
حتى غرامك صد ف صد
ما لقتشى الإحساس ف سلامَك
و لا قَدرّتش قلبى بجد
انت المظلوم وانت الجاني
ليه بإيديك عَاليت الحد
ليل الوحدة كُله مخالب
بـ تخربش ف جِبين أرواحنا
بُعدك هو الموت لكيانى
مهما نـخبى أو يوم بوحنا
مش معركه مين فيها الغالب
بـ النسيان هـ نصبر روحنا
إبعد يالله .. فَضى مكانَك
قُربك أصبح ما لهوش معنىَ
كانت طيبة قلبى خطيئة
وانت خطيئتك قسوة كتيرة
كل ملامحى سهلة بريئة
وانت ملامحك بُركان غِيرة
طيبتى خلاص بُكرة هـ تتحول
وأشغل قلبك وسط الحيرة
اقتل إحيى إخدع إوفي
ياله فارقنى فُضها سيره
********
