مش كل البكتيريا ضارة.. تعرف على الأنواع المفيدة بالجسم

عدد الردود 0

المضادات الحيوية !!

الأمعاء ربنا سبحنه وتعالى عاملها نظام بكتيرى وظيفته مساعدتها فى عملها , من حيث هضم المواد الغذائية اللى متقدرش تهضمها المعدة والكبد والبنكرياس بعصاراتهم الهاضمة , وكمان محاربة أى بكتريا ممرضة تدخل الجهاز الهضمى , وبيعتبر الوسط البكتيرى ده جزء لا يتجزأ من الجهاز الهضمى والنظام المناعى , لكن للأسف الأستخدام الخاطىء والمفرط للمضادات الحيوية , بيقتل الوسط البكتيرى ده وبيخلى الجهاز الهضمى خالى منه , خصوصا ان فيه ناس بالنسبة لهم المضادات الحيوية هى الحل السحرى لأى مشكلة , يجيله انفلونزا ياخد مضاد حيوى , صداع ياخد مضاد حيوى , عنيه او ودانه او سنانه توجعه او حتى مفاصله توجعه ياخد مضاد حيوى , ومن غير وصفة طبية تحدد نوع المضاد ده ولا جرعته ولا مدة استعماله , ده فيه ناس بتاخده احتياطى علشان متعياش !! فبتكون النتيجة ان الجهاز الهضمى يبقى ضعيف وغير قادر على القيام بوظايفه , وتظهر مشاكل القولون العصبى وعسر الهضم والأمساك والعدوى المعوية المتكررة وتقرحات المعدة والأمعاء , يا جماعة مش كل البكتريا ضارة وممرضة , البكتريا مخلوقات زينا بالظبط , فيه منها الضار ومنها النافع اللى ربنا سخره لخدمة اجسامنا ومصالحنا , ومينفعش ناخد العاطل بالباطل ونستعمل مبيد يقضى على المفيد والضار مع بعض , كده احنا بنعمل زى اللى عنده نمل بيهاجم منحل العسل بتاعه وياكل العسل مثلا , فبدال ما يستعمل مبيد مخصص للنمل يموته من غير ما يموت النحل اللى بينتج العسل , لأ يستعمل مبيد حشرى عام يموت الأتنين مع بعض !! لو انت محتاج مضاد حيوى يبقى لازم يكون مضاد حيوى مخصص للبكتريا اللى سببتلك المرض ويكون بالجرعة والمدة الكافيين لأبادة البكتريا دى وبس مش ابادة أى بكتريا موجودة والسلام , وممكن يبيد كل انواع البكتريا ماعدا اللى أمرضتك !! اللى يحدد الكلام ده الطبيب مش أى حد غيره , هو اللى يعرف المرض اللى اصابك ده ايه وايه البكتريا اللى بتسببه وايه المضاد الحيوى اللى بيموتها , زى بالظبط ماهو مينفعش تصطاد سمك بالبندقية ولا بط بالسنارة .