مين اللى معلمنى أحِب
وأحِس بالجمال والخير
مين علمك تنقر فى الحَب
وترفرف جناحات وتطير
ما ترد يا طير
هو هو اللى معلمنا
ومحفظنا ومفهمنا
هو اللى خلقنا وصممنا
تسلم إيده .. رب كبير
...
طب مين اللى علمنى أتمصر
وافضل فيكى لحد اما اكبر
تعملى فيا عمايل سوده
وانا ما بيدى ولازم أتصبر
عايش فيكى وميت خوف
ومانيش أعمى وشايف شوف
كل الدنيا لفوق وانا تحت
واسَكـِّت روحى واقول دى ظروف
...
الأجنبى طب ولا انا أقرب
شايف بعنيا ومستصعب
حق كرامه أمان منداس
والوسواس .. بيقولى ما تهرب
...
أهرب بس واروح على فين
لو جناحين بدل الرجلين
هطير واحط على شجره فيكى
ولازم اشفيكى من الملاعين
...
أهرب بس واروح على فين
كل ما ليا فيكى رجلين
بس ما اقدرش أشيلهم
أصل جدورهم .. متمسمرين
...
زى حوا جميلة حوريه
متجوزك رسمى وشرعيه
ونفس نفس الطبع المؤرِف
ساعه حنيه .. وساعات نكديه
...
وجبت منك عيال كتير
أحلام عذارى .. وطموح كبير
ما اقدرش ارميكى وارميهم
طب مين يربيهم ؟؟
أنا لسه عندى ضمير
