فيسبوك
واتساب
ألف مليون مبروك يا عريس
كان حلم جميل من غير كوابيس
عديت فيه على المتاريس
ومجهودك ما راح فطيس
كانت رحلة تعب من الألف للياء
ورحلة كفاح ما راحت هباء
كانت الحياة طعمها مر
والأيام ما راضية تمر
كنت فاكر إنك وحيد
وحلمك صعب وبعيد
لكن رب الوجود موجود
ودعوات أمك ما ليها حدود
كانت لما تضيق الدنيا عليك
ورايحه جايه تخبط فيك
دموع كتير متحاشه فى عينيك
والآهات فى ضلوعك تكويك
تلاقى إيدها على كتفك تطبطب
وكلمة للنفس تُحيى وترطب
تقولك دايما خليها على الله
ما حد لجأ له إلا وأجب له
بس اسعى واصبر واتحمل
ولو وقعت قوم اقف وكمل
تلاقى الحاجة لها طعم وأجمل
واللى تقدر عليه اعمل
وبعد رحلة طويلة
كانت صعبة وتقيلة
الحلم أصبح حقيقة
والحياة بقت صديقة
بالعرق والتعب والشقى
ولا كان سهل اللقى
وفى وسط الحلم
الفجر شقشق
والحب على الباب دقدق
قال للقلب حب واعشق
على صوت عصفور زقزق
دخل على العين برقة ودلال
وسكن جواه وصال وجال
راح القلب داب فى هواه
وقال نفسى أكمل عمرى معاه
وسمعنا للحب غنوة
وزغروطة للفرح حلوة
قالوا بكره رايحين على بيتنا
وندعى الله يكمل فرحتنا
ومعانا أصحابنا وعيلتنا
وفى الفرح الليلة ليلتنا
بالبدلة و البابيون يا عريس
افرح من قلبك وهيص
بالفستان والطرحة يا عروسة
افرحى يا جميلة يا ننوسه
ويا طير طاير فى السما
ميل وغنى أحلى غنا
ده العيد هل علينا عيدين
جمع ووفق أجمل حبيبين
مع لمة الأحباب تزيد
وشموع الفرح تقيد
بس نصيحة منى صريحة
الجواز مش ورقة عند المأذون
الجواز حب وتفاهم وعقل موزون
وعشرة عمر عمرها ما تهون
الجدع هيصون ولا عمره يخون
والأصيلة تحطه جوه العيون
والقفة أم ودنين يشيلوها اتنين
وبقيتم روح واحدة مش روحين
الله يتمم لكم بالخير
ويضوى لياليكم ورود وعبير
وبريح العطر والعـود
الله يجعـل أيامكم كلها حب
وبالخيرعليكم يجود
