وأنت خارج خد حاجاتك
خد معاك الشبكة وكمان ذكرياتك
وأمى مش أمك هتبقى
ومش هتبقى فى يوم حماتك
كان طبيعى دموعى تنزل
كان طبيعى أتوجع
حتى نبض قلبى يمكن
من بعيد كان يتسمع
صدقينى لو هتقرى
شفت قلبى بيندبح
شفت دمعى نهر جارى
وماضى منى بيتسلخ
لسه فاكر
ولسه مش قادر أصدق
لسه فاكرك
وأنتى سايبة الحب يغرق
شىء طبيعى بعد مدة
أقلب الحزن ابتسامة
وشىء طبيعى أبنى بكرا
وأنتى أصلا مش معايا
حتى قلبى إن دق بعدك
كنت أقوله خلاص كفاية
هو أول حب ينفع
يجى بعده ....... استحالة
وزى ما قلبى اندبح
كنت بدبحه كل يوم
حتى لو فكر يدق
كنت بقلب حاله لوم
كنت أفكره بيكى دايما
كنت أقوله نويت تفوق
كنت أقوله لو هتعشق
يبقى أحسن لك تموت
وادى عمر علينا عدى
وبطوى صفحات السكوت
شوفى حالى إيه النهارده
وأنتى لسه أرض بور
زرعت بعدك ألف وردة
وأنتى وحدك مش حضور
