علق الإعلامى عمرو أديب، على المشادات داخل مجلس النواب أثناء مناقشة اتفاقية تعيين الحدود البحرية بين مصر والسعودية، قائلاً:"هيثم الحريرى قلع الجاكيتة وقالها انتى أمنجية، يعنى بتشتغل مع الأمن وعميلة يعنى، ودا نظرية هيثم، وهى قالتله انت بتقبض يعنى بيشتغل مع دولة أجنبية".
وأضاف أديب، خلال تقديمه برنامج "كل يوم"، على فضائية "ON Live"، أن المجلس به نوعين من البشر، مردفاً:" قاعدين مع بعض ازاى، أمنجية وعملاء، هو ده المجلس؟، لما هيثم قلع الجاكيت كان ناوى يعمل إيه فى الست، لو كانوا سابوك كنت هتعمل ايه؟".
وتساءل أديب مستهجناً:"ماله الاتحاد الاشتراكى، حزب واحد وحاجة واحدة وكان لطيف جداً؟، دلوقتى أنا كمواطن عاوزنى أعمل ايه؟ انتو ازاى عايشين مع بعض كده؟".
وتابع:" "أنا بشوف حاجة ميكس، لا هو اشتراكى ولا هو ديمقراطى، لا هو حزب واحد ولا تعدد أحزاب، هو حاجة كده، قالها بشنب ولا غير شنب يا زينب قالتله بين البينين".
وأردف أديب:"بقول لحضراتكم وأرجو توقعى يطلع غلط، احنا مكملين فى السكة دى للآخر وهتخلص على كده، أنا بريحكم، عشان محدش يقعد مستنى الماتش للآخر، وانت بقى بمجهودك للآخر اقعد اقرا واستفتى قلبك بقى"، مستطرداً:" مصارين البطن بتتخانق، كلنا مصريين وكلنا على حق، وكل واحد من حقه يقول ما يعتقده حق".
