فيسبوك
واتساب
مفطّراتى.. ماشى بآلاتى
ويّايا طبله.. بانده يا أبله
عنتر يفطّر حبيبته عبله
ويّايا آله.. ماشية بتكاله
شاعر يا خاله ومغنّواتى
مفطّراتى.. ماشى بآلاتى
بنقول له يا الله يا مأدّناتى
ادّن وكبّر.. الفول مشبّر
والباميه.. تسلم.. إيدين مراتى
يا شيخ مقامها.. واصل سلامها
قاعد مريدها.. يشرح كلامها
حمحم حمامها... على خير قدمها
قدّمنى صاحبى... أمّيت حرمها
صلّيت عليها.. مدّت إيديها
سلّمت بيدى على بنت سيدى
شى الله يا طاهرة.. والقرب ناجز
شى الله وقلبى فى الصفّ حاجز
شى الله وماشى فى الدنيا عاجز
شى الله يا ستّى.. يا أمّ العواجز
صايمين صيامنا.. يسبق قيامنا
سالمين سلامنا.. - سابق كلامنا -
هذا أوانى.. والنور إمامنا
لفّيت حوارى.. ساعة العصارى
ومشيت أغنّى فوق الكبارى:
............
الغاوى نقّط بالكلام غاوى
حدّاد كتب على طبل مكّاوى
الأرض دى أرضك
والعرض دا عرضك
والورد فى غيطان السما وردك
والنيّه نيّة كل واد ناوى
رمضان كريم يا سيده زينب
يا أبو الحسن يا حسين
يا فاطمة يا بنت الحسين
رمضان كريم يا «سطوحى يا ملثّم يا أبوالفتيان
يا قطب.. يا باب النبى، يا قدسى يا زاهد»
يا شاذلى يا جعفرى، يا دسوقى يا طاهر
رمضان كريم يا مرشدى.. يا سيّدى عبدالكريم
يا جيلى.. يا جيلانى.. يا رفاعى يا كركرى
يا قلبى يا مخاوى
..............
مفطّراتى.. ماشى بآلاتى
ويّايا طبلة ومغنّواتى
بنقول له يا الله يا مأدّناتى
ادّن وكبّر.. الفول مشبّر
والبامية.. تسلم.. إيدين مراتى
