مفطّراتى.. ماشى بآلاتى
ويّايا طبله.. بانده يا أبله
عنتر يفطّر حبيبته عبله
ويّايا آله.. ماشيه بتكاله
شاعر يا خاله ومغنّواتى
مفطّراتى.. ماشى بآلاتى
بنقول له يالله يا مأدّناتى
ادّن وكبّر.. الفول مشبّر
والباميه.. تسلم.. إيدين مراتى
يا بحر خبّى.. صاحبك مراكبى
حلاج وعاجبه توب الكواكبى
ثارت بلدنا... بانت سُعادنا
أمّى الأميره.. بيتنا ووتدنا
يا أرض دورتى صُبحًا وجورتى
ف ميدان لاظوغلى علّقت صورتى
ثارت بلدنا.. من غير جبرتى
يكتب معانا.. أوّل إدانه
الأرض دايره.. والناس جعانه
فوق ياض يا زيكو.. وانده لريكو
قومى يا سمره.. محتاج لتمره
تقطع صيامى.. يلزمنى لعمره
الدنيا والعه.. والشمس طالعه
هذا أوانى.. داير بزَلعه
لفّيت حوارى.. ساعة العصارى
ومشيت أغنّى فوق الكبارى:
............
يا حبيبتى يا أحلى ورده
النهارده:
- رغم طول الغربه ع القلب المخالف
وانتِ عارفه الغربه بارده-
قادر أضحك للعيال
قادر أتهجى الوشوش السمرا فى تراب الكنال
قادر أستنبط من الأسفلت مليون احتمال
قادر أتألّم .. وأقف..
وأسأل
وأصوّب رمحى فى عيون السؤال
قادر أجمح بالخيال الصعب فى دروب المحال
قادر أرقص.. وأبتسم
وأرمح.. وأعافر
قادر أتشقلط وأغنى معاكى وأستوطن وأسافر
قادر أتسحب عشانك ع الضوافر
قادر أتحوّل أسد وأرجع غزال
قادر أعلن إن أنا الفاتح بأمره
قادر أمشى على السكك لافع شوال
..............
مفطّراتى.. ماشى بآلاتى
ويّايا طبله ومغنّواتى
بنقول له يالله يا مأدّناتى
ادّن وكبّر.. الفول مشبّر
والباميه.. تسلم.. إيدين مراتى
تم أضافة تعليقك سوف يظهر بعد المراجعة