أنا الواد الأسمر
أبو قلب حب وداب
انا اللي بسمع لام كلثوم
وعبد الحليم و عمرو دياب
وياما جاب ورد أحمر
وبعت مليون جواب
وعشقتك أكتر من نفسي
والقلب عنك ولا يوم غاب
ولو طولت والله انا بنفسي
لاجيبلك القمر علي باب
واقولك كل اللي في نفسي
من غير مقدمات ولا خطاب
ورغم عيونى كلها خجل
بس القلب مهواش كداب
.......
أيوه حبيتك اول ما شوفتك
وقلبي مش ناسي المكان
وكنت خجلان اقولك بحبك
وعاشقك يا قمر من زمان
شوفت الجمال في عيونك
وكاني زورت " اسوان "
غزلت الربيع من توبك
ولشمسك بقيت عشقان
يا ناقشه ايديكي حنة
والخدود ... رمان
يا ام العيون مرسومة
ورمشها ... غزلان
مليانه حب وعشق
وللحب انا عطشان
ارويني حبة عشق
تحيي الحنين دبلان
.....
وعلي قد الشوق واللحظة
هقولهالك ومن غير حلفان
يا ماسكة الورد فى ايديكي
وريحته مسك من الريحان
ان كنتي بتعشقي الورد
فانا قلبي ليكي بستان
كلمة بحبك مش كفاية
وانتي في قلبي الحان
حبك ما يكفيه قصيدة
ولا حتي مية " ديوان"
تم أضافة تعليقك سوف يظهر بعد المراجعة