فيسبوك
واتساب
آلمنى جرحك
يا صاحبى وأخويا
مش لوحدك
حزنك كمان جوايا
مستغرب ليه
ما أنت طول عمرك
على الحلوة والمرة
معايا
دا مش مصابك
دا اللى صابنى صابك
مش دا طول عمره كلامك
فاكر لما كنا بنقسم اللقمة
وكنا كمان نفس الشلة
ونفس اللمة
فاكر لما قعدت جنبى تعيط
لما اتجرحت والطبيب
كان فى جرحى
عمال يخيط
فاكر لما كنا بنقسم الفرحة
فاكر لما كنت تقولى
دا يوم فرحك
هى دى الفرحة
طب فاكر لما كنا نتجمع
فى الكنيسة
لما كان حد من صحابنا
عريس أو عروسة
طب فاكر لما جيت فرحى
فى الجامع
وكان الكل فى الفرح جامع
بالله عليك تقولى
ساعتها حسيت فى بينا فرق
سواء فى الجامع أو الكنيسة
كنا واحد ما فى فرق
تفتكر بعد دا كله
ممكن الحزن يبعدك عنى
شمال أو شرق
استحالة
دا أنت منى ما فى بينا فرق
وإن نسيت أفكرك
حقيقة فعلا
وبكل حيادية
إحنا جدتنا كانت
فى الأصل مسيحية
يعنى أصلنا يا صاحبى واحد
وإيدى فى إيدك هتفضل
طول العمر
مستنية
