فى مجتمعنا الحبيب أصبح القتل يقع لأتفه الأسباب، وغالبا يرجع ذلك لسوء التعليم والجهل وعدم التوعية، فنحن نرى ونسمع يوميًا عن حالات قتل كثيرة، سواء زوج يقتل زوجته عشان خلافات أسرية، ابن يقتل أمه عشان يسرق فلوسها، ابنة تخطط مع عشيقها لقتل أبوها اللى رفض زواجهما، أب يعذب أولاده حتى الموت، وغيرها وغيرها تنزعج من كم هذه القضايا اليومية التى تحدث فى مجتمعنا الحبيب.
وتقرأ الخبر تلاقى الموضوع لا يستحق القتل ومعظمها أمور تافهة بالمرة، تيجى تبحث عن هذه المشاكل ما تلقيش قدامك غير «خيط واحد» ألا وهو الجهل منذ الصغر فى التربية والنشأة، بمعنى أصح اللى اتربى على ظروف معيشية غير صحيحة فى ناس بتخلف أولاد وتسيبهم فى الشوارع يتعلمون الألفاظ البذيئة والسلوك العنيف السيئ جدا، وغير كده وكده، لو سلوك الأب والأم سيئ أمام أبنائهم ويتلفظون بشتائم وألفاظ بذيئة، الأطفال هيرددوها يبقى دى قضية ثانية من الأبوين اللذين لا يدركان كيف يربيان أبناءهما تربية صحيحة، ولما الابن يكبر هيتبع نفس نهج الأبوين ويبقى الموضوع بقى بالوراثة.
يجب الانتباه من الدولة فى هذه القضاياً ويجب عمل برامج للتوعية عن هذه السلبيات، وكمان الزوج اللى يقتل أم عياله ده هيستفاد إيه بالمنطق كده أولا هيتسجن وأولاده هيكونوا يتامى وهيكبروا متشردين، لأن الأم توفت وأبوهم اتسجن تخيل لما الأبناء يكبروا ويعرفوا هذه القضية نفسيتهم هتكون عاملة إزاى حياتهم هتكون إزاى هيقدروا يتعاملوا مع الناس إزاى، يبقى النتيجة «صفر» يبقى ليه القتل، هتقولى شيطان هقولك ابعد عنه لو لقيت الموضوع هيتطور بينك وبين زوجتك سيب البيت وامشى اعمل أى شىء إلا «القتل» و«الضرب » ودايما انظر على نصف الكوباية المليان يعنى دايما انظر لأم عيالك «زوجتك» وافتكر لها الحاجات الحلوة، فى عز غضبك حاول تهدى نفسك مهما حصل عشان أولادك ما يتيتموش .
تم أضافة تعليقك سوف يظهر بعد المراجعة