3 ساعات كاملة استغرقتها لجنة النقل بالبرلمان خلال اجتماعها اليوم الأربعاء برئاسة اللواء سعيد طعيمة، فى نقاش واسع حول سعر تذكرة مترو الأنفاق، فى حضور وزيرى النقل وشئون مجلس النواب ورئيس شركة إدارة وتشغيل مترو الأنفاق، انتهت إلى تأكيد وزير النقل على نية رفع سعر التذكرة.
وعرض وزير النقل هشام عرفات خلال الاجتماع أبرز المشكلات التى تواجه مرفق المترو، مؤكداً أنه عرض الموقف الخاص بالشركة على مجلس الوزراء بالتفاصيل الكاملة، والخطورة المتوقعة حال استمراره بهذا الشكل، متابعاً : "لو ما اتصرفناش دلوقتى، هتبقى قنبلة هتنفجر، والمترو هيقف، هنجيب منين وميزانية الدولة فيها مشكلة".
وأضاف هشام عرفات فى كلمته للنواب: " الخط الأول للمترو لو توقف البلد هتتشل، ولو سبناه بالشكل دا ربنا هيحاسبنا عليه يوم القيامة، أنا مش بلف وبدور، ومش بتخابث، أنا راجل واضح ودى مشكلتى، ولو تم إسناد إدارة شركة المترو لشركة قطاع خاص، التذكرة هتبقى بـ8 جنيه، وبالطبع الناس هترفض".
ورداً على غضب عدد من النواب حول الحديث عن رفع سعر التذكرة، عقب الوزير، :"أى وزير هييجى هيبقى مهتم يراضى الشعب، هل لديكم شك إنى مهتم بإنى ألاقى لنفسى شعبية، لكن فيه حاجات هتقع يا جماعة وضميرى لا يتحمل، أنا دخلت عش الدبابير، وعارف إنى هدخله، لكن ربنا هيحاسبنى".
ونقل الوزير تجربته فى أول يوم لعمله فى الوزارة، قائلاً: " أول يوم حلفت اليمين رحت الوزارة بمترو الأنفاق، ولقيت الناس بتوع عزبة النخل بيقولولى انت ليه لحد دلوقتى ما زودتش سعر التذكرة"، مشيراً إلى أن سعر تذكرة مترو الأنفاق بدولة الإمارات 3 دراهم، وعقب اللواء سعيد طعيمة رئيس اللجنة، : " هل هناك عندهم نفس الزحام زى عندنا".
واختتم الوزير كلمته، بأن الخط الأول لمترو لم يخضع لأى تطوير علمى منذ 30 عاما، وأن خطوط مترو الأنفاق تحتاج لأموال بشكل عاجل لعمل خطط للأمان، متابعاً: "خطوط المترو فيها مشاكل لو ما اتحلتش دلوقتى، هتبقى مصيبة كبيرة، واللهم بلغت اللهم فاشهد"، كاشفاً أن راتب سائق المترو 11 ألف جنيه، وأن حجم العمالة أصبح عبئا كبيرا.
وفى المقابل، رفض عدد كبير من نواب لجنة النقل حديث الوزير عن زيادة سعر تذكرة مترو الأنفاق، وقال اللواء سعيد طعيمة رئيس لجنة النقل بالبرلمان، فى حديثه للوزير خلال اجتماع اللجنة :" شركة المترو بتحقق خسائر ضخمة، وأنا دايماً بقول إن اللى بيخسر يروّح، الميكروباص الواحد بيأكل عيلتين وتلاتة، فما بالنا بمرفق ضخم مثل مترو الأنفاق".
ووجه النائب عماد محروس عضو لجنة النقل بالبرلمان، كلمة حادة لوزير النقل، رافضًا خلالها توقيع أى زيادة على سعر تذكرة المترو، قائلاً: "بلاش تقف فى مواجهة الغلابة، لابد من إقالة المسئولين عن إدارة المترو، ووضع استراتيجية بمعرفة سيادتك لإعادة التطوير، الناس مش متحملة، ومحدش هيقدر يتكلم".
واستطرد عضو لجنة النقل بالبرلمان، خلال كلمته موجهًا حديثه بغضب عارم للوزير، قائلًا : "لجنة النقل مش هتكون أبدًا محلل لزيادة أسعار تذكرة المترو، وإحنا وكل أعضاء اللجنة وكل النواب ضد أى زيادة أسعار الآن، حكومة شريف إسماعيل بتحل كل مشاكلها على حساب ذبح المواطن، والله العظيم الناس مش لاقية فلوس تركب مواصلات أصلاً".
وتابع محروس: "صحيح سعر التذكرة قليل، لكن الوقت ده غلط، الحكومة كده ماشية ضد توجهات الرئيس، وكل يوم بتخنق الناس، وكل يوم أعباء إضافية، واحنا مش عارفين نودى وشنا من الناس فين، أيوه الجنيه هيفرق مع رب الأسرة اللى عنده أولاد، مين الأسرة اللى هتقدر تتحمل عبء إضافى 400 جنيه فى الشهر".
كما شهدت اللجنة انقساما فى الرأى بين وكيليها، حيث اعترض وحيد قرقر وكيل لجنة النقل بالبرلمان، على رفع سعر تذكرة مترو الأنفاق، معلناً تنصله من قرارات الحكومة فى هذا الشأن، خلال اجتماع لجنة النقل المنعقد اليوم الأربعاء برئاسة اللواء سعيد طعيمه، وبحضور وزيرى النقل وشئون مجلس النواب، لمناقشة سعر تذكرة المترو.
وتابع "قرقر" فى كلمته التى وجهها لوزير النقل: "أقل موظف عندى فى الشركة النهاردة بياخد 6000 جنيه ومش قادر يعيش، المفروض واحنا بنعمل مشروعات كبيرة، نحافظ على البعد الاجتماعى، واحنا كبرلمان قلنا احنا مع الحكومة فى الإصلاح الاقتصادى".
وفى المقابل، قال محمد بدوى دسوقى الوكيل الثانى للجنة النقل، إن زيادة سعر تذكرة المترو ضرورى، مضيفا : " لما نتكلم عن البعد الاجتماعى، احنا كده بنحط السم فى العسل، لازم التذكرة تزيد، واللى خد قرار تحرير سعر الصرف يقدر ياخد أى قرار تانى، مش عاوزين نتعامل بالعواطف، وإلا مش هنلاقى المترو أصلاً، لازم التذكرة تزيد علشان المترو يقدر يكمل"، مقترحاً أن تكون سعر التذكرة 3 جنيهات تكون صالحة لمدة 24 ساعة.
واعترض عدد من نواب لجنة النقل على حديث "دسوقى"، وقالوا له : " اتكلم عن نفسك، خلوا التذكرة بـ 10 جنيه علشان محمد بدوى دسوقى يرتاح".
وفى نهاية الاجتماع، قال اللواء سعيد طعيمة رئيس لجنة النقل فى تصريحات للمحررين البرلمانيين، إن اللجنة سترجئ موقفها النهائى من قرار زيادة سعر التذكرة إلى اجتماع آخر بحضور الوزير، ودراسة مقترح مُفصل بشأن الزيادة وحجمها.
عدد الردود 0
بواسطة:
Ahmed
وكان مصر مافيهاش خبرا اقتصاد واداره
لازم يعرض ارقام واضحه للايراذات و المصروفات و بعدين المكن بايظ اصلا يعنى اللى بيتهرب من التذكره هتحمله على اللى بيدفغ والمترو من حلوان للمرج منور ف النهار حوالى 40 لمبه نيون فى تسع عربيات لزمن رحله اكتر من ساعه و بعدين بتخسر ما بتعرفش تزود التقاطر فى الذروه عشان الناس تركب مش عارف تعمل باركينج جنب المحطات فين الاشتركات واستىمر فلوسها اعمل حوافز انتاج على الايراد صفحه على الفيس لتقييم الخدمه وحاسبهم عليها
عدد الردود 0
بواسطة:
khaled soudi
تعريف الغلابه ؟
يعم النائب من فضلك عرفلنا ما معني الغلابا ؟ اللي ركبين سيارات اخر موديل وبيخدوا التموين ؟ولا الشحاتيين اللي بيعملوا 300 جنيه في اليوم من الشحاته في الطرقات وعربات المترو ؟ ولا الموظفين اللي مرتباتهم اكتر من 3000 جنيه ومبيعملوش شغله ولا مشغله الا الرغي والكلام في الفاضي ؟ مين يالبضبط ؟؟؟؟؟ يعم النائب
عدد الردود 0
بواسطة:
الدبور
الحل سهل وبسيط عربة بجنية للفقراء وعربة بجنيهين لمتوسطى الدخل وثلاثة او اكثر للغنى
حتى لايحدث مالايحمد عقباة الحل سهل وبسيط عربتين بجنية للفقراء وعربتين بجنيهين لمتوسطى الدخل وثلاثة او اكثر للغنى فمثلا العربتين الاخيرتين بجنية ولونها ازرق او اى علامة اخرى والعربتين التاليتين المشار اليها بلون او اى شئ اخر بجنيهين وهكذا فالحل سهل ويرضى الجميع وهذا ليس أختراع بل موجود بترام مدينة الاسكندرية والجميع راضى ولاتوجد مشاكل
عدد الردود 0
بواسطة:
حسن
حكومه فاشله
المترو بيخسر وسواق المترو بياخد 11000طيب انت مش شايف انك وزير فاشل
عدد الردود 0
بواسطة:
حامد المصري
المترو بيخسر ازاي
لو المتكلم مجنون فالمستمع عاقل متوسط عدد الركاب اليومي للمترو 2.5 مليون راكب يعنى 2.5 مليون جنيه يوميا في بفرض ان الراكب سوف يذهب او يعود فقط نوتقل عدد الركاب ذهاب 2 مليون وعوده 2 مليون اذن 4 مليون راكب في اليوم الواحد يعنى 4 مليون جنيه يوميا ..... نيجي لموضوع الأجور سواق المترو 11000 جنيه ومديره 22000 الف جنيه واللى فوق المدير طبعا اكتر مرتب والسيد الوزير ومكتب السيد الوزير مش عارف كام هذا عير الحوافز ............ اقصد اقول المترو مش بيخسر لكن سوء ادارة وفساد وبلطجة ..... الحل الدوله تدعم الكهرباء للمترو وبلاش تعذيب في الراكب الغلبان اللى مرتب 10 ركاب من المترو تساوي مرتب البيه سواق المترو ............. طظ في التعليم وسنوات العمر اللي ضاعت في الحصول على شهاده عليا ومش عارف اعيش بيها
عدد الردود 0
بواسطة:
بركة
الواقع
خلينا واقعيين ونتكلم بصراحة وبلاش لعب بعواطف البسطاء .. ابسط مواطن في مصر بيشحن الموبايل ممكن بعسرة جنيهات .. ابسط مواطن في مصر بيركب التكتك مسافة قصيرة ب 3 جنيه .. ابسط مواطن مدخن بيصرف 20 جنيه يوميا على التدخين .. هل معقول بجنيه واحد الراكب يلف القاهرة .. كونوا ايجابيين حتى لاتتوقف خدمة المترو ...
عدد الردود 0
بواسطة:
مصرية
السادة النواب خائفون على أصوات ناخبيهم
السادة النواب خائفون على أصوات ناخبيهم بغض النظر عن مصلحة مصر وبغض النظر عن أن مرفق مترو الأنفاق أصبح متهالك وسينتهي قريباً إذا لم يتم التحرك لصيانته ورفع كفائته، مرفق نقل يخدم ملايين يومياً لابد أن يتم صيانته جيداً وإلا سيتوقف وينهار كما انهارت كل البنية التحية المتهالكة لمصر على مدار السنوات الأخيرة لأنها لم تتم صيانتها وتجديدها منذ إنشائها منذ عقود طويلة. مرافق مصر كلها متهالكة ويجب تجديدها وواجبنا كشعب أن نتحمل مسئولياتنا مثلما تتحملها بلدنا ومثلما يتحملها جيشنا وشرطتنا ومثلما يتحملها الشهداء وأهالي الشهداء
عدد الردود 0
بواسطة:
Abu Doma
سنوياً و ليس شهريا
يا جماعة راتب السائق 11000 جنية في السنة و ليس شهريا يعني حوالي 900 شهريا بلاش نظلم السائق المشرفين المحترمين و المديرين و غيره إللي ملهمش أي لازمة و قاعدين في المحطات يشربوا شاي و حكاوي و شغل قهاوي هما إللي بيقبضوا بدلات و حوافز و خلافة إعمل رقابة محترمة و غرامات بجد و أنت مش حتلاقي أي شخص يتهرب من قطع تذكرة ولا بياعين و لا شحاتين جوه المترو رجع النظام القديم بتاع كل مجموعة محطات بسعر يعني أول خمس محطات أو أربعة بجنية و كل أربعة زيادة بنص جنية يعني لو حركب 10 محطات أدفع جنية و نص أو إتنين و علي فكرة دول كتير عامله كده و كل 3 محطات بسعر. و لازم تطبيق غرامات التدخين أولاً علي موظفين المترو قبل الركاب و أرحمونا بقي
عدد الردود 0
بواسطة:
khaled soudi
الي رقم 3
أيوه كدا كلامك سليم عشره علي عشره . نقسم المترو الي عربات بتلاته واثنين وجنيه ونصف زي الاتوبيس بتاع زمان . كانت الدرجه الاولي ب قرشين صاغ والثانيه بقرش . وممكن تكون العربه ام ثلاثه جنيه مكيفه او نخلي المترو المكيف بثلاثه جنيه التذكره والغاوي ينقط بطقيته .