ألو اذيك يا أما
عاملة ايه يا أجمل حب
وأحلى ضمة
وحشتينى ووحشنى البيت واللمة
اذيك يا حبيبي
عامل ايه واخبارك ايه
عايش بدعواتك ليه
و رضاكى عليه
يا اجمل مافى الدنيا ديه
محتار يا امي
من ايه يا ابني
مش عارف اجيب لك ايه هدية
وانا عارف
لا تسوى كنوز الدنيا ديه
والعالم بلى فيه
لحظة من عمرك فنتيه عليه
عارفه يا امي
انا يمكن كنت عارف
انك وابويا تحبوني
بس يمكن ما كنت أعرف
قد ايه حبكم
الا ما شفت ولادى نور عيوني
ساعتها حسيت قد ايه
حبكم الكبير انا عايش بيه
تعبكم معانا كان كبير
وصبركم علينا كان كتير
ولما كنت أتمنى حاجة
ولا حتى تشوفوا عيونى تطلبها
وقبل حتى ما أقول عايزها
كنتم تجيبوها لي
كل ذرة حب منى لولادي
عرفت أن حبكم ليا اتولد
من يوم ميلادي
عارفه يا اما
كل يوم ورا يوم يمر
أتمنى أكون جنبك طول العمر
وكفاية نظرة او كلمة منك
تطيب خاطرى وتصبرنى على كل مر
يا ابنى انا مش عايزة حاجة
ولا لأى حاجة محتاجة
اتمنى اشوفك مبسوط وسعيد
ولو حتى عن عينى بعيد
واحب اسمع على طول
ضحكتك وصوتك
ويقلقنى يا ابنى صمتك وسكوتك
ادعى لى يا اما دعواتك مجابه
لا ليها سور ولا بوابة
بدعيلك فى كل اذان
يسترها عليك فى كل مكان
يسهل حالك ويريح بالك
ويرزقك برزق عيالك
يا رب يبارك لى فيكي
وليه ولأخواتى يخليكي
وما يحرمنى منك
انا ما أقدر أستغنى عنك
انا مهما كبرت
بحس انى صغير معاكي
ولو أقدر يا أما
أعيش عمرى كله وياكي
وأكون خدامك
يا ساكنه فى قلبى وروحي
دى الجنة تحت اقدامك
وحبك دوايا لكل جروحي
ومهما قلت أو كتبت
وبالله سبحانه حلفت
ما اقدر أوصفك
ولا أى حد يشبهك
كل سنة وأنتى بخير
يا أم قلب كله طيبه وخير
كل ساعة وكل يوم
وأنتى فى صحة وسعادة تدوم
مش عايزة حاجة من ابنك
ما أقدر يا ابنى أستغنى عنك
اشوفك على خير
وانت يا حبيبى طيب وبخير
بتوحشينى يا أما
يا احلى حب وأحلى ضمه
بقى مش بالذمة دى أحلى مكالمة
عدد الردود 0
بواسطة:
خالد جلال
قصيده
قصيده جميله وكلمات رائعه ودائما من نجاح الى نجاح بالتوفيق
عدد الردود 0
بواسطة:
نشات رشدي منصور / استراليا
حلوة. بشكل. ..... طعمة. بشكل.
اذا كانت الام. ربة. البيت. السعيد. فان. الاب. هو. حارسه. الأمين. .... ولك. مني. موفور. تحياتي. .