رضوى راضى
قبل 6 أشهر من النهاردة كنت لسه ببدأ أيامى الأولى فى الثانوية العامة، وكأى طالب مصرى غلبان لا يفقه شيئا فى الحياة سوى تحمير البطاطس وشفرات لعبة "جى تى إيه" ومشهد معركة ناصر الأسطورة ومحمد النمر، حسيت أن هيحصل فيا زى البطاطس لما تتحط فى الزيت أو زى بنات الكباريه لما مايكل يدخل يقتلهم أو زى محمد النمر لما معرفش الفرق بين الراجل والست... وفى نفس الوقت كنت مستغربة إزاى أخواتى الكبار شايفنى مأفورة الموضوع أوى وثانوية دى زى السكينة فى الحلاوة فقعدت مع مامتى أعرف عدوا بيها بـ"كليات قمة" إزاى..
أول ما سألت السؤال كان فيه إجابة سريعة وحادة وكأنها مشغلة الأنسرماشين وقالتلى "مفيش حاجة اسمها كليات قمة فى حاجة اسمها مجال حباه وحبه أدرسه فهدخل الكلية إلى هدرسه فيها، "بصراحة كنت متوقعة إجابة تانية خالص زى مثلاً قلتلهم يا تطلعوا زى بنت طنط جيهان يا هطفى السجاير فى وشكم، ولما سألت تانى سؤال وكان "أعدى منها بمجموع كبير ازاى؟" استخدمت نفس الحدة والسرعة فى الإجابة بس المرة دى أبهرتنى و قالتلى "هاتى ميكى جيب من الدرج جوة و تعالى"..أنا قلت بقى قشطة يلا نلعب بلا ثانوية عامة بلا بتاع بس اكتشفت غير كده تماماً، فتحنا ميكى جيب وجبنا "لعبة المتاهة" وبدأت ماما تشرحلى الثانوية العامة عالمتاهة بتاعة ميكي! كالأتى:
أنتى الفار والجبنة إلى برا دى هى المجموع إلى أنتى عايزاه لو حطينا القلم وبدأنا نحل المتاهة من غير ما نفهمها الأول ممكن نقابل طرق سد كتير ونشخبط ونزهق ونسيبها ونقوم وموصلناش للمجموع اللى إحنا عايزينه"...نفس الإحساس اللى أنا حاسيته واللى أنتم دلوقتى حسينه هو قد إيه المثال بتاع مامتى بسيط وتافه وده بقى نفس إحساسى ناحية ثانوية عامة دلوقتى..بساطة الفكرة وهدفها خلانى منسهاش أبداً كل ما أبتدى أزهق.. وبدأت فعلاً استخدم تكنيك "المتاهة" فى الثانوية العامة، واللى عبارة عن أفهم أحصل أكبر كمية معلومات فى أقل عدد ساعات مع راحة وأكل ونوم وترفيه، وأبعد عن كل الناس إلى بيدلدق منها تشاؤم وأفورة وأركز على نفسى..
أه إحنا مجبورين على أسوأ تعليم فى الدنيا وأكثره تخلفا، وأه إحنا مجبورين على مناهج مبتتغيرش من أيام ما كان جد جدى فى ثانوية عامة بس ده مش مبرر يخليك تعيش فى دور الضحية!
كطالبة فى ثانوية عامة مفيش فرق بينى وبينك بقول طبعاَ مش مبرر خالص والدنيا أبسط من كده كتير...المناهج مفهومة والكلام خدناه على مدار سنين تعليمنا فى المدرسة كلها مش بناخد هيروغليفى أو حاجة، الفكرة بس فى الكمية ومناهج ترمين مضغوطة فى امتحان واحد فإحنا بنتكلم بس على تنظيم وقت وأولويات مش هتمشى بالكوسة كدة.. ده بالنسبة للفكرة نفسها.
أما بالنسبة لحضرتك بقى فقدامك حلين: إما تنساق ورا الشباب بتاعة سنة ملهاش أى لازمة ومش هتفيدك فى حاجة قدام وخدوا إيه اللى دخلوا جامعات واتخرجوا فكك يا عم ومتعرضهاش كده! أو ترتقى بنفسك وتقعد تفكر فى قد إيه هى مهمة كبداية مشوارك ومستقبلك ومتعلقش كسلك وعدم نضجك على شماعات ملهاش لازمة، أو فكر فى اللى بيصرفوا على دروسك اللى بتزوغ منها وربنا هو اللى يعرف بيعانوا قد إيه، أو بطل تعيش جوا حياة لاعب الكورة ولا الممثل ولا أى حد مشهور، وفى الوقت الكل المطلوب منك شوية شغل وصبر وتعب وتحقق حاجة يمكن تخليك زى الحد المشهور ده...هى سنة وبتعدى أسرع من عبد الله السعيد أقل حاجة هتكسبها لو عديت بيها حلو إنك هتفرح نفسك وتحس قد إيه أنت عملت إنجاز وقد إيه الموضوع تافه ومش مستاهل البروبجاندا دى كلها وذاكر وهزها شوية أحسن ما تندم لما تخلص ..
فاضل أقل من 100 يوم وتمتحن وتخلص ثانوية عامة خالص ده لو أنت فيها ولو مش فيها مسيرك تبقى فيها فركز.. تحصيلك متأخر أحسن ميت مرة من ولا حاجة، حبيت أقولكم على شوية حجات بعملها بتأثر جداً فى تحصيلى مش هقول مذاكرتى – بتجيلى أرتكاريا من الكلمة دى- هتساعدكم أنتم كمان وحتى لو كنت محصل 10% بس من أول السنة لو اشتغلت بجد هتجيب مجموع كبير أن شاء الله:
أهم 3 حجات يا صاحبى هما حاجتان، تقرب من ربنا..حتى لو كنت مبتركعهاش بس صلى وقربله وادعيله يقف جنبك علشان دى أكتر حاجة أنت محتاجها...تانى حاجة تبعد..أكيد أنت عارف تبعد عن مين، "صحاب السوء" و دى الحاجة اللى خليتنى أخد ثانوية عامة من 440 كيلومتر بعيد عن القاهرة علشان أفصل من القرف اللى كان فى حياتى وفعلاً ده فرق جداً، مش بقول أنك تروح كوالالمبور تاخد ثانوية عامة بس أنك تبعد ده مهم جداً جداً، تالت حاجة تخلى عندك دافع داخلى قبل الدافع الخارجى..يعنى أيه؟ يعنى أنت بتذاكر علشان تبقى حاجة، علشان نفسكن علشان مستقبلك مش علشان الكلية اللى عايزها بس أو لعربية اللى هتجيلك لو نجحت أو..أو..رابع حاجة وده أساس ثانوية عامة زى ما قلت قبل كده تنظم وقتك بورقة وقلم وتكتب الحجات إلى لازم تخلص اليوم بيومه ومتكترش على نفسك علشان لو مخلصتش اللى مكتوب هتحبط وتريح أيام بس تكون ورقتك معقولة...مش هقولك أقفل سوشال ميديا وادفن الموبايل فى الصحرا الشرقية والكلام ده بس عامل نفسك بشكل أرقى من كده و خلى وقت المذاكرة للمذاكرة و أقفل الواى فاى أو الداتا وهتلاقى نفسك بتنجز و بتحصل حلو جداً لدرجة أنك مش بتمسك الموبايل كتير خلاص وعايز تخلص حاجات أكتر، كفاية تسويف ومماطلة وحارب عقلك لأن عدوك الوحيد هو عقلك، لأنه بيرفض أى شكل من اشكال التعب أو الخوف أو الإرهاق لأنه أتخلق على كده علشان يخلينا عايشين أكبر وقت ممكن، فبيحاول بكل حاجة ينيمك ويكسلك بس فيه حاجة قريتها هى علاج الخمس ثوانى وده يعنى تعد من 1 لـ 5 وقبل الخمسة تكون قمت من عالسرير أو بدأت مذاكرة و بطلت سرحان وبكده تكون بتحارب عقلك وبتتغلب عليه وبتعوده إنك صاحب القرار مش هو..لسا مش حاسس بدافع كبير تبدأ اتفرج على فيديوهات موتيفاشين عاليوتيوب واقفل وابدأ بحاجة وخلصها هتلاقى نفسك حسيت الحجات اللى وراك بتقل وواحدة واحدة بتخلص كل حاجة، بالنسبة للناس اللى بتسمع أغانى فمن المستحب أنك تسمع موسيقى هادية من غير كلام وفيه موسيقى مخصصة للمذاكرة والتركيز بس موجودة عاليوتيوب.. بالنسبة للنوم فمن 7 لـ9 سعات فى اليوم مهم جداَ مش هتحصل حلو لو مش بتنام حلو، والأكل يكون صحى مش محشى وبصارة فتاكل وتنام، والمهم برضو وجبة خفيفة وسط المذاكرة زى بار شوكولا أو طبق فاكهة...متبصش على مين بيجيب كام فى الدرس ومين بيذاكر إزاى ركز على نفسك ودارى على شمعتك تقيد بس مش بكدب وأفورة الموضوع مش مستاهل!..ساعة واحدة بس رياضة فى اليوم إنشاء الله شوية رقص وتنطيط بس بتساعدك وبتفتح نفسك...مكان المذاكرة مهم مهم مهم أهم منك وبلاش السرير خالص علشان هتنام زى الدباديب ومش هتذاكر حاجة، فحاول تذاكر فى مكان مريح إضاءته حلوة واتحرك وأنت بتذاكر قوم اتمشى شوية أو روح أوضة تانية، قبل ما تعود تذاكر وربنا يفتحها فى وشك كده هات كل حاجة هتحتاجها علشان متقومش لما تبدأ..حاول تغيير أساليب المذاكرة يعنى جرب تذاكر على موقع www.Quizlet.com وبعد ما بتذاكر بيسألك وبيديلك درجة وطبعاً مفيش أحسن من كده بس زى ما اتفقنا لا فيس بوك ولا غيره وقت المذاكرة...
وأخر حاجة خلى ثقتك فى نفسك كبيرة أوى وخليك دايماً فاكر..مفيش صعب..ومفيش سهل..فى حاجة قادر أفهمها...وحاجة مش قادر أفهمها..بس هحاول وأفهمها.
