د.مصطفى النادى محمد موسى يكتب: للأزواج فقط الحب أنواع

سأتحدث فى هذا المقال باللغة اللى يقدر يفهمها أى حد، زى ما بنقول كده (بالبلدى).

د.جارى تشابمان يشرح ببساطة فى كتابه لغات الحب الخمسة، الذى غير حياة ملايين من الأزواج فى جميع أنحاء العالم، طريقة منظمة جدا بيقسم بيها أنواع الحب اللى كل شخص من الزوجين يحب أنه يستقبله، والنوع اللى المفروض إنه يقدمه لشريك حياته.

فكرة الكتاب الأساسية تدور على أن كل زوج أو زوجة، بيكون له لغة بيحس بيها أن شريك حياته بيحبه فعلا… ممكن تكون اللغة دى مختلفة عن اللغة اللى شريك حياته بيحس بيها بالحب… ولو كل واحد من الزوجين يتعلم لغة حب زوجه أو زوجته. هيغير حياتهم بجد.

وإن كل شخص، بيكون عنده إناء أو وعاء أو تانك للحب زى تانك البنزين بتاع العربية بالظبط… علشان الشخص يقدر يعيش حياة سعيدة، لازم تانك الحب بتاعه يكون مليان.

إنت كزوج لازم تتأكد إنك تملى تانك الحب بتاع زوجتك باستمرار، وأنتى كزوجة لازم تتأكدى أنك تملى تانك الحب بتاع زوجك باستمرار.

لو أنت أو أنتى سيبتوا تانك الحب بتاع شريك حياتكم يفضى… هايعمل زى العربية اللى تانك البنزين بتاعها فاضى… مش هاتمشى.

أنتى كزوجة زوجك مش هايقدر يسعدك لو سمحتى لتانك الحب بتاعه أنه يقل أو يفضى.

وأنت كزوج زوجتك مش هاتقدر تسعدك لو سيبت تانك الحب بتاعها أنه يقل أو يفضى.

وطالما تانك الحب زى تانك البنزين، ماينفعش تملاه مرة فى العمر وتتوقع أنه يفضل يلف بيك طول العمر، دا زى تانك بنزين العربية بالظبط، لازم يتملى باستمرار.

الطريقة بقى اللى بيتملى بيها تانك البنزين ده، هو محور الكتاب كله… أن كل شخص بيكون عنده لغة أساسية ولغة ثانوية من خمس لغات للحب.

لو لبيت وحققت وتواصلت مع شريك حياتك بلغة الحب الأساسية اللى بيفهمها… وكمان لغة الحب الثانوية اللى بعدها… هاتخليه يحس بالحب… وده أهم إحساس فى الكون لأى إنسان.

تعالوا الأول نشوف إيه هما الخمس لغات للحب، وبعدين إزاى نطبقهم:

1- لغة الحب الأولى: كلمات التشجيع والثناء.

2- لغة الحب الثانية: تكريس الوقت وقضاء الأوقات سويا.

3- لغة الحب الثالثة: تقديم الهدايا.

4- لغة الحب الرابعة: الأعمال الخدمية.

5- لغة الحب الخامسة: الاتصال الجسدى والعلاقات الزوجية.

الزوج: بيعمل كل حاجة هو شايف إنها المفروض تسعد زوجته، وبدل ما تشكره، مش طايقة الحياة معاه.

الزوجة: بتموت نفسها علشان بيتها وعلشان تسعد زوجها، وبدل ما يساعدها ويشكرها، بيشتكى منها.

د.جارى مؤلف الكتاب اكتشف ببساطة أن كل واحد من الزوجين دول بيتكلم لغة مختلفة تماما عن زوجه، كأن واحد إنجليزى سافر الصين، وبيكلم الناس بالإنجليزى… ومتغاظ جدا من غباء الناس إنهم مش بيفهموه مع أن لغته الإنجليزية واضحة جدا، إزاى مش فاهمين كل اللى هو بيقوله؟؟؟ الموضوع ببساطة… مش أن الراجل الإنجليزى وحش، أو الصينين وحشين، الموضوع أن كل واحد منهم بيتكلم لغة مختلفة، ولازم يتعلموا يتكلموا لغة بعض علشان يقدروا يوصلوا كلامهم لبعض.

دى بالظبط زى قصة الزوج والزوجة، الزوج بيقدم الحب لزوجته وأسرته بطريقه (أو بلغة) هو شايفها أفضل طريقة فى الدنيا، بس زوجته مش فاهمها خالص… لأنها لغة أجنبية وغريبة عنها، مش هاتفهما مهما اتكلم اللغة دى كويس، نفس الحكاية، الزوجة بتتكلم لغة حب بتحاول تسعد بيها زوجها وأسرتها، بس زوجها مش بيفهم اللغة دى، فهو مش شايف إنها بتقدم حب وسعادة للأسرة.

الجميل بقى جدا جدا فى الموضوع، أن اللغات دى معروفة كويس أوى، وتعليمها سهل جدا.

 لغة الحب الأولى: كلمات التشجيع والثناء

إنك تختار إنك تقول لزوجتك: ربنا يكون فى عونك على اجتهادك فى البيت ومع الأولاد.

إنك تختارى إنك تقولى لزوجك: ربنا يعينك على اجتهادك فى الشغل.

لما زوجتك تعمل أى حاجة حلوة حتى لو بسيطة، تختار إنك تلاحظها وتشكرها عليها.

ولما زوجك يعمل أى حاجة حلوة، تشجيعه بكلمة شكر وتشجيع عليها، ولما تشكر فى زوجتك أمام أولادكم وباباها ومامتها وأخواتها، ولما أنتى تعملى نفس الحكاية مع زوجك، فرق الحياة بيكون زى الفرق بين السما والأرض، لما نتعلم لغة الحب الأولى: كلمات التشجيع والثناء.

كل زوج وكل زوجة لازم يتعلموا كويس جدا إزاى يستخدموا كلمات التشجيع والثناء، والحب هايتولد من جديد.

لغة الحب الثانية: تكريس الوقت وقضاء الأوقات سويا

بالنسبة لبعض الأزواج والزوجات، إنهم يقضوا وقت حقيقى مع أزواجهم يعملوا فيه حاجة مشتركة… هى دى اللحظة اللى بيحسوا فيها بالحب.

ده بالظبط عكس لو الزوج قاعد بيتفرج على ماتش ومراته ماعندهاش أى اهتمام بيه.

أو زوجة بتتفرج على مسلسل زوجها ماعندوش أى اهتمام بيه، أو كل واحد فيهم ماسك الموبايل بتاعه وعايش فى كوكب لواحده.

لغة الحب الثالثة:

بعض الأزواج… مش بيحس بقيمته عند الزوج أو الزوجة، إلا لما الشخص الآخر يجتهد فى أنه يختار ويقدم له هدية.

لو أحد الزوجين، بيحس بالحب، وتانك الحب بتاعه بيتملى بالهدية… يبقى دى من أهم لغات الحب اللى الطرف الآخر لازم يتعلمها، ومن الدروس المستفادة من هذا الكتاب:

1- لو أنت فاكر إنك ممكن تعيش حياة زوجية سعيدة مع زوجتك، من غير ما تستثمر من وقتك فى قراءة كتب عن الزواج وتتعلم إزاى تكون زوج تسعد أسرتك… يبقى اعرف أن ده أقرب للمستحيل.

2- لو أنتى فاكرة إنك ممكن تعيشى حياة زوجية مع زوجك، من غير ما تستثمرى من وقتك فى قراءة كتب عن الزواج وتتعلمى إزاى تكونى زوجة تسعدى أسرتك… يبقى اعرفى أن ده أقرب للمستحيل.

3- لو أنت فاكر أن حد من أصحابك أو أهلك هاينصحك نصائح تصلح لك زواجك… يبقى يصلحوا هما زواجهم الأول… لازم نصائح الزواج تاخدها من استشارى متخصص فى الزواج… أو كتاب كاتبه متخصص فى حلول مشاكل الزواج.

4- لو أنتى فاكرة أن واحدة صاحبتك هتنصحك نصيحة تصلحى بيها زواجك… تبقى تصلح هى زواجها الأول… لازم تقرأى من كتاب متخصص…. صاحباتك نوعين… واحد آخرها تهديكى (لو أنتى محظوظة بصديقة نادرة كده)… وصديقة تانية… هاتحولك مشاكلك التافهة لنهاية حياتك الزوجية…. علشان تصلحى زواجك… لازم قراءة وتعلم من "متخصص".

5- الحب أجمل إحساس بين الزوجين… مسئوليتك كزوج إنك تخلى زوجتك تحس بحبك ليها… ومسئوليتك كزوجة تخلى زوجك يحس بالحب…. ده مش تكرم من حد فيكم… لازم تتعلموا إزاى توصلوا الحب لبعض… علشان الحب ده يرجع لكم تانى.

6- الحب هو أجمل إحساس فى الحياة كلها… بيخلى الناس تطير فى السما…. وتعمل مستحيلات… ولازم تتعلم إزاى توصل الحب… ولازم تتعلم إزاى تفهم لغة حب شريك حياتك.

7- عايز تعيش حياة سعيدة؟ حب زوجتك ووصل لها الحب ده وخليها تحسه فى قلبها بجد…. الموضوع محتاج تعلم ومجهود واستثمار… مش مجرد كلام… وبياخد وقت… بس ابدأ اجتهد… وأنت حياتك هاتتحول لجنة أن شاء الله.

8- عايزة تعيشى حياة سعيدة؟ حبى زوجك ووصلى ليه الحب… وصلى ليه أنك بتحبيه… استثمرى فى التعلم بجد… وماتخديش نصائح من أى حد مش متخص.