ظهرت فى مصر مؤخرا طبقة جديدة نسبت نفسها للطبقة المتوسطة اسمها طبقة بتاعتى.
الطبقة دى تعرفها من عنيها وحواجبها، تلاقيها كدة موجهة عنيها للحاجة اللى ناوية تصطادها وتنسبها لبتاعتى وتلاقى حواجبها مرفوعة لفوق وغالبا بيبقى حاجب فوق وحاجب تحت .
أهم شىء عند الطبقة دى أنها تاخد اللى مش ليها بدون أى هدف إلا لإشباع مرض بداخلهم او إحساس داخلى، مجرد أنهم يضايقون صاحب الحق اللى هو أساسا من الطبقة المتوسطة الحقيقية.
أبناء طبقة بتاعتى بيعرفوا بعض كويس وعمرهم مايضايقوا بعض ولا ياخدوا من بعض بالعكس دول بيتعاونوا مع بعض علشان يستكردوا ابناء الطبقة المتوسطة .
طبقة بتاعتى موجودة فى كل مكان، فى النادى، فى الشركات، فى جميع المؤسسات الحكومية، فى البنوك فى المستشفيات والعيادات ، فى السوبر ماركت، منتشرة انتشارا شديدا جدا، عنيهم على كل حاجة وخصوصا الأدوار . أهم حاجة عندهم إنهم ياخدوا اول الصفوف سواء صف قبض او صف دفع فاتورة او حتى صف قفا،،، المهم انهم يقطعوا الصف ويقولوا دة دورى .
لو حد خبرة فى الحياة حيعرفهم كويس ولو مش خبرة حنعرف حضرتك عليهم ....... لو واقف فى طابور دفع المشتريات عند أى سوبر ماركت أو ما شابه حتلاقى كده أن فيه حد مكركب بيتحرك كتير ومش واقف مرتاح، حتلاقى عينة زايغة من أول الصف لنصفه، بيدور على الضحية اللى حيستكردها وطبعا لازم تكون من الطبقات المتوسطة لأن لو من طبقة بتاعتى ما ينفعش، لأن فيه بينهم اتفاق نفسى، وما يقدرش على الطبقة الغنية لأنها ممكن تعايرة وتفضحه وكفاية النظرة اللى حياخدها من فوق لتحت اللى حتفكرة باصلة قبل ما يلزق نفسة فى الطبقة المتوسطة . طبعا يختار الضحية من الطبقة المتوسطة و يقرب منها و يخبط فيها شوية لحد ما الضحية يزهق و يطالبة بانة يبعد شوية وهنا بقى يدخل بالعافية ويقولة اى حجة ، سايب العيال فى البيت لوحدهم، مستأذن من الشغل وسايب المكتب، حشترى حاجات بسيطة، رجلى بتوجعنى ........ اى عذر مستفز وخلاص .... اخر عذر ضحكتى فى ماكينة صرف النقود بجانب مكتب إحدى أعضاء طبقة بتاعتى قالتلى ..... الماكينة دى بتاعتى ...... طبعا الضحية مش حيعرف يتخانق معاة لانة إنسان محترم ولأن الجانى حيكون خلاص وقف امامة او اخد اللى يخص الضحية وساعتها مفيش الا الشجار اللى بيرفضة الضحية .
أما عن كيفية التعامل مع أبناء هذه الطبقة الدخيلة، أعتقد انة التجاهل التام لوجودهم لأنهم عاملين زى الجراد لو اجتمعوا عليك حياكلوك حياكلوك .
المشكلة الأكبر أن كتير من أبناء الطبقة دى وصلت لفوق ومسكت مراكز كبيرة فى الوظائف، فبدأت تتعامل مع الوظيفة بنفس المبدأ. ... مبدأ بتاعتى، اخدوا اللى ليهم واللى مش ليهم، وظفوا الوظيفة لمصالحهم الشخصية، خلوا الوظيفة تخدمهم مش هم اللى يخدموها . وظهر الفساد وانتشر واتوغل فى كل الطبقات نتيجة الإحساس بالظلم والقهر .
طبقة بتاعتى هى طبقة متسلقة، تسلقت للطبقة المتوسطة و استغلوها واستغلوا وظائفها واشغالها ليصلوا للطبقة الغنية و هم سبب الفساد .
