قالوا عليها كلام كتير
قالوا عليها مفهاش خير
قالوا خيرها مش ليها
طب قولى إزاى عايش فيها
قالوا عليها كلام وقالوا
قالوا كتير وعادوا وزادوا
لا الكلام أثر فيها
مهما قالت الدنيا عليها
أصل فيه ناس عينها عليها
عشان طمعانه فيها
غاوية دمار وهدم
ومصلحتها تبقى دم
عايزة تهدها وتخربها
وتجيب عاليها واطيها
وناس موجودة فيها
مش مهتمة ولا حاسة بيها
عايزة الحاجة تجيلها
وهيا مفخدة فيها
وناس لبلدها كرهاها
غربة وهجرة تتمناها
وناس بعيدة عنها
تموت وترجع لها
وطلبها تدفن فيها
وناس تحبها من سكات
عشقاها لحد الممات
نفسها تعلى وتكبر
وإن شاء الله تكبر أكبر وأكتر
قالوا عليها كلام كتير
وأنا بقول لسه فيها الخير
