وائل عبد الودود حسين يكتب: شجرة حب

دى حاجة تحير

يتولد الحب صغير

ويكبر مع الأيام

زى شجرة

مولودة فى صحرا

فى ظروف صعبة

وبصبر ومشقة

تكبر برغم الآلام

زى لحن

فيه حب وشجن

وعتاب وخصام

وكلام ولا فى الأحلام

يعيش مع الأيام

ده من غير حب

ولا دقة قلب

صعب تعيش وتحب

ومن غير مشاعر

الحب راحل ومش راجع

لا شوق ولا أمل

ولا حلم يكتمل

لا لوم ولا عتاب

ولا صفا بين الأحباب

الحب محتاج رحمة

يعيش فى وسط الزحمة

الحب قوى

لكن فى أوقات ضعيف

لما تضيع قيمته

ولا يبقى له تصنيف

أو يترسم ويتجمل بتزييف

ومن غير الميه

الشجرة تموت وتدبل

وفى رحلة غياب تعيش

وحزن يدوم ويطول

وشجرة الحب

من غير اهتمام ورعاية

من غير حماية وعناية

ورغبة فى البقاء

وإصرار بين الأحباء

لا تكبر ولا تعيش

وحلم وجودها مفيش

وتغيب الشجرة

ورا أيام الحزن

ورا دموع حايرة

بين الرمش والجفن

لو نسيتها تنساك

وتنسى ليالى هواك

ولو بعدت واتخليت

تهملك لو رحت وجيت

ولو غضب الحب اتمرد

ومن مشاعره اتجرد

يثور ويعلن العصيان

على أى كائن كان

كرامته فوق كل شيء

ويعمل أى شيء

ازرع شجرة حب

فى صحراء أيامك

تحميك وتدفى قلبك

وتداوى كل آلامك

من وحشة الزمن

ووحدة ملهاش ثمن

وخسة بشر فى المحن

وممكن الحب يبعد

وفى لحظة تبقى وحيد

تدور على عمر ضاع

وزمن مش راجع من جديد