فيسبوك
واتساب
يا حكومة يا ما سمعنا منك التصاريح
بأسعار معقولة هتداوا منا المجاريح
كلامكم زى لون الورد بلسان فصيح
طعمه زى الزبدة يطلع النهار يسيح
***
عومتم الجنيه بقى نونو كمان كسيح
اسعار نار وجشع من دخلنا بيستبيح
فجل وجرجير وخس كعصابة تشبيح
سمكنا بيبكى علينا بنشتريه كتفاريح
***
الفراخ زى أحلام عجوزة بالمراجيح
دبحونا زى كتكوت على نار تشويح
كان الدولار قزم قدام خمسة لحاليح
أحلامنا بقت سمكة بلعتها التماسيح
***
بصراحة ياحكومتنا انت بكدا رخوة
مفيش رقابة ودايما بتضربى لخمة
زودنا متاحف اكلنا بصورة اللحمة
باشوفك ياحكومتنا شمطاء ورخمة
***
الطبيخ على النار هزيل بلا شحمه
الغلبان على قفاه من العضم وحمه
ياحكومة كفاية الوعود بقت زحمه
ياشيخة غورى قلبتى حياتنا فحمه
***
فوضنا امرنا بقهرك لرب العالمين
شمتى فينا الجيران واحنا صابرين
فين سيف العدالة ونهم المستغلين
ترجع الأسعار وتبقى ست الحلوين
***
ياحكومة ارحلى واحنا مش ناسيين
اهدرت صحتنا العضم كل يوم بيلين
يارب بلدى وحبايبى وكلنا الغلبانين
ابعد عنا الشياطين قولوا معايا آمين
