فيسبوك
واتساب
سؤال مهم وإجابته طويلة شوية .. بس أعتقد أنها هتفيد كل اللى هيقرأها
فيه دكتور نفسى شهير جدا فى أمريكا اسمه " د. فيل ماكجرو " وقال " إن استخراج رخصة القيادة أفضل من استخراج وثيقة الزواج .. لأن فى الحالة الأولى يخضعونك فى اختبارات صارمة .. كى يضمنوا لك الاحتراف فى القيادة ... لكن الزواج لا تسبقه أى اختبارات .. كى تضمن لك علاقة جيدة " .
خليك فاكر الكلام ده لأنك هتحتاجه بعدين ندخل فى الموضوع بقى ونقول .. بسم الله الرحمن الرحيم .
عارفين إيه اللى جايبنا ورا فى العلاقات وبتخلى أكتر العلاقات بتفشل ؟!
الحاجات اللى أنت بتتفرج عليها زى الأفلام والمسلسلات والقصص والروايات اللى بيبقى فيها حب بزيادة شوية ... والمشكلة إن أنت كـ راجل بتحط نفسك مكان البطل وبتتخيل نفسك مكانه .. وأنتى كـ بنت بتبقى عايزة واحد زى البطل ده وبتحطى نفسك مكان البطلة برضه .
أنت لو معتقد إن الحاجات اللى بتبقى فى التلفزيونات والسينما حقيقية .. فـ أنا مش هستبعد عليك أنك مقتنع تماما إن فيه واحد جاى من الفضاء وعلى ضهرة عباية حمرة وملابسه الداخلية فوق الخارجية .. لو أنت معتقد إن " سوبر مان " ده شخص حقيقى يبقى أنت كدة مافيش رجى منك .. والحاجات دى لحست دماغ بالبلدى .... الحاجات دى بتأثر على عقلك وبتخلى عقلك يفكر فى حجات مالهاش أى علاقة بـ اللى أنت فيه .
بس عشان ماطولش عليكم برضه لأنى مش عارف أنا هنهى كلامى إمتى ... أنا عايزك تعرف إن " مافيش حاجة اسمها فشل بس فيه نتائج غير متوقعة " و " مش كل اللى أنت شايفه فشل بنسبه لك بيقى كدة فعلا " .
" مثال " .... أنت لو دخلت امتحان .. وجبت فى الامتحان ده 7 من 10 .. لو أنت كنت حاطط احتمالات وتوقعات إن أنت كان ممكن تجيب أكتر من الرقم ده .. فـ بالتالى هتعتبر إن الدرجة دى بنسبة لك فشل ... لكن أنت لو كنت متوقع ان كان ممكن تجيب فى الامتحان 5 من 10 .. فـ الرقم ده بنسبه لك نجاح مش فشل .
وهو ده بالظبط اللى بيحصل فى اكتر العلاقات ... انت بتبقى حاطت مابينك وبين نفسك توقعات واحتمالات انك هتعيش حياة سعيدة وهنية زى ما كان البطل عايش مع البطلة .. ولما ترتبط وتشوف ان كل الحجات اللى انت توقعتها دى ماحصلتش خالص فى الحقيقة او مع الشخص اللى انت ارتبط بيه .. هتقول عليها انكم فشلتوا .
المشكلة ان كل قصص الحب والروايات والافلام والمسلسلات بتجيب جزء صغير اوى من العلاقة نفسها .. وبتلاقى ان البطل والبطلة بيعشوا وسط الشموع والورود والعصافير المغردة .. وفيه ما بينهم لهفة طول الوقت واشتياق .. ونظراتهم لبعض بتكون نظرات عشق وغرام .. وكلامهم كله ما بيخرجش عن الكلام الرومانسى .. ولو كان الفيلم نفسه +18 هيبقى فيه حجات تانية برضة رومانسية ...... بس كل الكلام ده خزعبلات بتصنعها الدراما فى عقلك ومش صحيحة بالمرة .
طيب سؤال ... لو كلامى ده صحيح وان الحب فعلا مش بالافلام والمسلسلات والحاجات دى .. امال ايه هى العلاقات اللى بتنجح ؟؟
تعالى انا بقى اقول لك ايه هو اللى بينجحه
بص يا ابو الشباب وانتى يا ست البنات ... اى علاقة فى الدنيا بتمر او المفروض تمر بـ 3 مراحل .. " مرحله الانبهار ... مرحله الاكتشاف .. مرحله التعايش "
1- مرحلة الانبهار ..... فى المرحلة دى بتشوف الشخص اللى انت بتحبه " كامل " ومش ناقصه اى حاجه خالص .. ظريف ودمه خفيف .. عاقل .. محترم .. كلامه فيه حكمه .. وبتكون فرحان وانت بتتكلم معاه وفرحان اكتر وانت بتقضى وقت جنبه .. وبتحس انه مختلف خالص عن اى حد انت قابلته فى حياتك .. بتحس انه فعلا شخص كامل .
والمرحله دى هى اللى نجحت قصايد الحب وكل اغانى الحب اللى فى الدنيا دى .. لان كل شخص كتب حاجه من دول كان بيكتب وهو فى مرحلة الانبهار وبيوصف بيها حبيبه .
2- مرحلة الاكتشاف ... فى المرحلة دى انت بتكتشف ان الشخص اللى انت كنت شايفه كامل .. مش كامل زى ما انت كنت فاكر .. وبيبدأ يحصل خلافات مابينكم .. وبتشوف عيوب فى الشخص ده انت ماكنتش شايفها " زى مابيقولوا كده مرايه الحب عاميه " .. ومشكله تجر مشكله فى مشكله وهكذا ...... طب واللى بيحصل فى المرحلة التانيه ده طبيعى ؟؟
الاجابة ... ايوووووه طبيعى جدا .. ولما ده يحصل معاك اعرف ان انت كده فى الطريق الصحيح .. لان فى الوقت ده انت بتشوف الشخص اللى انت بتحبه على حقيقته .. ووقتها انت بتقرر انت هتكمل معاه ولا لاء .
3- مرحلة التعايش ... والمرحله دى تعتبر من اهم المراحل فى العلاقه ... لان انت بتتعايش مع الشخص اللى انت بتحبه بكل عيوبه ومميزاته .. لو عديتوا المرحله دى بنجاح اعرفوا انكم هتعيشوا احسن من البطلين اللى كان نفسكم تعيشوا زيهم .
" العلاقه الناجحة هى اللى بتحافظ على اتزانها فى جميع المراحل " .
ماتخليش حاجه تسيطر عليك .. عش حياتك مع الشخص اللى انت بتحبه زى ما انتوا مع بعض ..
وع فكرة .. طبيعى جدا ان انت وشريك حياتك تكونوا مختلفين ... انت عيش فى بيئة غير اللى هو عاش فيها .. انت اتربيت من اب وام غير ابوه وامه .. انت اتعلمت حاجات غير اللى هو اتعلمها .. انت ليك اصحاب غير اصحابه .. انت لك مبدأ فى حياتك غير مبادئه هو ... طبيعى جدا انكم تكونوا مختلفين ..... لكن فى الافلام والحاجات دى .. بتلاقى ان البطل والبطله متشابهين جدا فى كل حاجه ... م الاخر كده كل ده ضحك ع العقول .. عيشها زى ما انت عايشها .. مش زى ما غيرك عاشها.
