خدعونا فقالوا: الفساد وصل للركب ولا حد دارى بيه !
أمال اللى بلغ الحنجرة وجاب الغرغرة ده ياسادة كنهه أيه ؟!
بعد بشاعة حكايات فساد القمح والهرى الكتير اللى اتقال عليه
فجأة السكر ظهر له حوت بيتكرع بعد مالهف 100 مليون جنيه
ومسكوا 30 طن سكر مدعوم مع سواق لمخزن خاص رايح يوديه
مش عارف عاملين قَلَبان ومستكترين ع الراجل انه يوزن دماغه ليه
الراجل قهوته سكر زيادة بكل زوق واحترام بيقدمها للى بيلاغيه
بس خلوا بالكو من الرز دوره جاى والبداية قشه بيولّعوا فيه
بيملا السما غيمه سوده والخبرا مش لاقيين منفذ لحل يوصلوا ليه !
خبرا الفضائيات بقالهم سنوات مجتمعين بيشربوا شاى ونص كافيه
لكن هانت خلاص اطمنوا الحل جاى بيزحف على ايديه ورجليه
نفضها سيرة وبلاها حيرة إحنا من أساسه نزرع ارضنا رز ليه ؟!
هو دا الحل الجذرى للمشكلة برمتها من غير ازاى ومن غير ليه؟
الأحسن نزرعها مكرونة سباجيتى وزرعها مش محتاج حد يسقيه
ومسكوا ملح فاسد ودى مصيبة كبرى حتى الملح اللى بنخلل بيه ؟!
والملح مايفسدش ليه هو احسن من مسؤولين كبار طلعوا فاسدين يابيه
الفساد معناه غرغرينا والطب بيقول : مالهاش إلا البتر تتاوى بيه
الفساد من 30 سنه مكوش على رزقنا ياحكومتنا منتظره إيه ؟!
تم أضافة تعليقك سوف يظهر بعد المراجعة