متقولش أنا مصرى وأنت بمنتهى السهولة ترمى زبالة
وتوسخ شوارعها
متقولش أنا مصرى وأنت مابتعملش شغلك ومعطل مصالحها
متقولش أنا مصرى وأنت بتكتب وتشخبط على آثارها وبتمحى ملامحها
متقولش أنا مصرى وأنت بتعاكس وتتحرش ببنات بلدك وتهين كرامتها
متقولش أنا مصرى وأنت بترمى نفايات فى نيلها وملوث ميتها
متقولش أنا مصرى وأنت ماشى عكس الاتجاه وكاسر كل إشارتها
متقولش أنا مصرى وأنت بتهين وتقتل أخوك المصرى ومسوأ سمعتها
متقولش أنا مصرى وأنت ثاير على كل شىء فيها رغم إنك عايش فى خيرها وتحت ضلها
متقولش أنا مصرى وأنت بايع ضميرك ومش همك اللى بيحصلها
متقولش أنا مصرى وأنت معندكش أى انتماء ليها ولا بتحبها
متقولش أنا مصرى وأنت بتصدق أى كلام يتقال وتمشى ورا أى إشاعات مش فاهم حقيقتها
آه يا مصرى لو هتفضل كده يبقى جبت آخرتها
وبكده يا مصرى تبقى كتبت بأيدك لمصر نهايتها
