وأنا قاعدة بأشم الفواحة
باتكلم ع الفيس بصراحة
وخدودى دى زى التفاحة
من أسفى الفيس كله بجاحة
وأنا قاعدة باشم الفواحة
وبأزأز تفاح بالراحة
أنا شفت الفن كتير هابط
والساقط يمسك فى اللاقط
وشباب بالبنطلونات ساقط
والبوكسر باين بشرايط
يارجولة مافيش للفيس رابط
يارجولة فين الأخلاق غابت
وأنا أحب أتكلم بصراحة
وأنا قاعدة باشم الفواحة
وأنا قاعدة بأدور كده ع النت
وبشوف الواد يصطاد البت
ومافيش رابط كله بجاحة
سامحونى هاتكلم بسماحة
وأنا قاعدة باشم الفواحة
ياسمك يالبن كله سياسة
وجميعهم خبرا اقتصاديين
وجميعهم خبراء دنيا ودين
والعلم إمترشق فى المخيخ
وجميعهم أدباء فنيين
وجميعهم شرفاء مش فاسدين
ضامنين للجنة ياناس طاهرين
والمنصب نوشطاء سياسين
ويافيس بكاش كله بجاحة
وأنا قاعدة باشم الفواحة
آه يا فيس ياعجين الفلاحة
يامغزى الفتنة فى غمضة عين
تحرق فى نسيجنا بلد واتنين
وتشوه كل الوطنيين
وعاملى مثالى يازفت وطين
لخبط فى حياة المصريين
مع إن الدين كله سماحة
أخلاقه مسامحة ووضاحة
وهاحسبن ع الفيس بالراحة
آه يا فيس يا عجين الفلاحة
توأم للبقرة النطاحة
دمرت الأخلاق ببجاحة
وأنا قاعدة باشم الفواحة
الست آهى بتشتكى للست
ودى نفسها جوزها يشيل البت
ويبطل شات ع الفيس والنت
أسرار فى بيوت وأنا عقلى يشت
ودى تشكى إنها مش مرتاحة
وحماتها دى حمة وأباحة
ودى جوزها آهو فلس بصراحة
ودى عملت شفط ومرتاحة
ودى جوزها بيحلف إن الست
خارباها بشات وقعاد عاالنت
وبيحلف طالق بصراحة
مع إنه كمان قاعد عالنت
آه يا فيس يا عجين الفلاحة
آه يا فيس آه يا عكاك يا تكية
عشنا وشفنا البقرة ذكية
بقرونها تكسر فى الدنيا
وخواجة صانعها بتقنية
تهدم فى قيمنا العربية
سياسية دينية وعرفية
وتنسى الفلاح طبلية
يا ما شفنا عليها إطباق بامية
والعشرة وأخلاقنا العالية
والفتة تعوم فى التقلية
واللمة فى وقت العشوية
تحلاو بطشة ملوخية
وصباح الخير فى الصبحية
وأطباق الفول والطعمية
وصنعنا شباب كله وقاحة
آه يافيس ياعجين الفلاحة
