ابنى العزيز..
امشى دايماً فى حالك وخليك إنسان بسيط
لا تصاحب واحد أهبل ولا تمشى مع العبيط
وتجنب مشى النذل واللئيم وأى حد حويط
سيبك من اللى يهرج ومقضيها كمان تنطيط
يا ابنى صديق السوء ما يجبشى غير التوريط
هيشدك للسجاير وأخواتها من المساخيط
ومعاهم علبة بيرة أو حبة من أى شريط
ودى حاجة مالهاش لازمة تخلى المخ يشيط
والمدمن دايماً بيهرتل، كلام مليان أغاليط
يمشى دايماً يطوّح ويضرب دماغه فى الحيط
واللى يعمل من نفسه أهبل، العيال وراه تزيط
طول ما أنت ماشى صح وأمورك كلها تخطيط
تتعشى وتنام بدرى، تصحى مرتاح ونشيط
سيبك من اللى يسهرك وابعد عن اللخابيط
تروح مشاويرك فايق ولو شغال فى الغيط
الفراعنة بنوا الأهرام وبرعوا فى التحنيط
وأسسوا علم الفلك وتفوقوا على البرانيط
وابن بطوطة برضوا شوف عدى كام محيط
العلم طريقة مش سهل وطويل وبحره غويط
واصرف على قد فلوسك ولو تتعشى سميط
وما تسيبش حقك أبداً، فى الحق مفيش تفريط
هتعيش فى سعادة وهنا ويبقالك سمعة وسيط
تم أضافة تعليقك سوف يظهر بعد المراجعة