حمدى نصر يكتب: لعنة روما تصيب الأهلى بالغرغروما!

بداية أوضح وأقول: إنه حسب بيان لمركز ام خلدون لاستطلاع الأمراض المستعصية فإن الغرغروما هو اسم الدلع للدلعادى الغرور!!.. وهى توأم مرض الغرغرينا واخته فى الرضاعة وكانت سببا فى انهيار فريق الأهلى وضياعه!!

ولكونى ممارس عام فى الرغى الرياضى أقول: إن الأهلى يستاهل كل اللى يجراله الغالى باعه رخيص ولا يحسبوش غالى !
لكن واضح حسب التشخيص المبدئى وقبل الكونسولتو نقول: إن فيروس تغيير المدربين تسرب للأهلى بفعل فاعل وبحقن ملوثة غير صديقة.!!

شالو حسام جابو مدرب قالوا عنه تمام.. مرهم لكل الآلام ويحقق كل الاحلام لو كانت الرؤية ضلام !!
جابو مبروك وقالوا انه راجل مبروك وفعلا جاب البطولات

لكن مشكلته انه خسر بعض المباريات.. والادارة كانت وراه بالشومة تتلقاه فطار مبروك وطارت البركة معاه.

جابو بيسيرو رمى السر فبيرو وفلسع قبل ما يتم تغييرو.
جابو زيزو خطف السوبر من الزمالك وخلاه يقعد على قرابيزو !!!
جابو بسلامته خبير الكورة الهولندى مارتن يول
ثبت اكرامى لانه شاطر فى لم الكورة من جوه الجول!!!

طمّع فى الأهلى فرق الدورى وبعد الفوز على روما والإصابة بلعنتها وظهور أعراض الغرغروما والخسائر تنهال على الأهلى بالكوما.. والفريق اللى كان زى السكر بقى ياعينى دايما مهدد بالكوما !!..والمختصون يقولون: للإسف فإن العلاج الوحيد للغرغرينا واخته فى الرضاعة الغرغروما هو البتر.. لذلك لابد ان يشهد الأهلى مجزرة جديدة تشبه مجزرة 92 التى كانت بإشارة من المايسترو والإمبراطور صالح سليم رئيس النادى يرحمه الله، والتى اطاحت بنجوم كبار بعد فوزهم مباشرة بكأس مصر على حساب الزمالك لأن عطاءهم حسب تقدير المدرب كان فى المنحنى النازل وأبرزهم مارادونا مصر والعالم العربى: طاهر ابوزيد، والكابتن الخلوق المجتهد الذى مثل مصر فى كأس العالم ربيع ياسين المظلوم الذى اطاحوا به قبل أن يهل علينا الربيع العربي؟!!، ومنهم ايضا علاء ميهوب ومحمود صالح..

وفى ظل التعاقدات الجديد جابو حجازى.. ولعبه كله مجازى.. جابو صالح وركنوه على دكة التصليح.. جابو السوليه قال اعمال ايه واللى حواليه بيتمنوا السو ليه ؟!!!.

جابو"ايفونا" واللى كأن الاصابات بالنسبة له افيونا!!وغيره وغيره من غير تفسير لان الهم متلتل وكبير

والغريب والمريب ان الأهلى يتمسك حالياً بلاعبين بدأت ماكيناتهم "تخلط"" !! رغم ان نتائجه زى بندول الساعة مرة يمين ومرة "شمين".. وذات زمان استغنى عن لاعبين حصدوا معه بطولات وكانوا مايزالوا فى الفورمة.. ولعبوا فى أندية أخرى ودوخوا الأهلى لما لعبوا ضده وعلى سبيل المثال لا الحصر: أمير عبد الحميد، فوزى صالح، محمود ابو الدهب، شادى محمد، أحمد السيد، اينو، محمد فاروق، علاء ابراهيم، وليد صلاح الدين. أما الحضرى وحسام وإبراهيم حسن فخارج هذه المعادلة

وآدى بطولة افريقيا الحلم المصرى أصبحت كابوس.. عليه العوض فى فريق كان اسمه: المحروس وتيشيرته بيتاقل بملايين الفلوس!! فيا مجلس إدارة الأهلى احرقوا حتت شبه وشوفوا بمين حتتشبه واعرفوا مين اللى جاب العفريت عشان يصرفوا: انصرفوا مأجورين.