ماركو ملاك يوسف يكتب: مسّحراتى

مسحّراتى أنا..
أنا جاى أهنّيكم..
شهر السرور والهنا
ياسادة يا ركاب راح تبتدى الرحلة..
مدتها..تلاتين يوم
لو كنت يوم عازم
بكرة تكون معزوم
كريم يا شهر الصوم
ولكل يوم معنى
بالخير مجمّعنا..
فى أوّلك رحمة
وفى آخرك الجنّة
فى اللمة نتهنّى
والرحمة تملا الأرض
والحب يستنّى
نفطر سوا مع بعض..
قبل الفطار مايحيين
هنعدّى ع المساكين
ونجود بما موجود
وهندعى للمولى
يدّى الفقير أولى..
يجعل قلوبنا سبيل
يجعل جيوبنا سبيل
وبخيره يملانا..
فهندّى مجانا
البركة جات ببلاش
تديها ليه بفلوس ؟!
مسحّراتى أنا..
ماسك فى إيدى فانوس
بينوّر السكة
وقت السحور قد حان
وأنا جاى أصحّكيم
اصحى ياعم فلان
راح تبتدى الرحلة