محمد زكريا حبيشى يكتب: حرف جر

قلبك انتِ حرف جر
جر قلبى كتير وراه
شُفت برد معاه وحر
بس ما وصلتش مداه
قلب عاصى قلبِك انتِ
كل شيء يحتار معاه

عِشت موهوم بالمحبه
و انتِ عشتى للمرايه
عمرى ما قدرت استخبى
من مشاعرى.. من هوايا
كنتِ قادره تشكلينى
م البدايه للنهايه

كنُت مغشوش ايوه عارف
بس ليه كَدْبت نفسى
كان حنينى ليك جارف
و انت بتحنى وتقسى
حتى قلبى طول حياته
يفتكرلك وانت تنسى

لومت نفسى كتير لأنى
كنت مش عايز افارق
كل شئ فيا سألنى
ليه بتعشق قلب سارق
ليه بتتمناله ضحكُه
و انت بالنسباله كلمه
واقفه ف نهاية مفارق

الحقيقه ف لحظة توجع
بس بتريح وتشفى
و انت ما قدرتيش تلومى
قلبى يوم أو حتى تعفى
إمتى باب الشوق يداعب
سِجن قلبك.. إمتى تصفي

هو مكتوب ليه عليا
ان اعيش بيكِ واموت
ليه ما شوفتش غير قاسيه
عايشه ف حروف السكوت
ليه بشيل الهم واقبل
حتى من غير أى صوت

تشكى دايماً من طباعى
تشكى منى حتى ليا
رغم ان ما كانشى داعى
ان اشوف منك أذيه
اكسرى بإيدك غرورك
وافهمى قلبى شوية