سوزان بدوى تكتب: بالحب نقهر الصعاب

إن ماتوا البشر مانخافشى
فلكل أجلٍ كتاب
واللى اتسبب فى موتهم
فى الدنيا أو فى الآخرة
هيكون له يوم حساب
ومادام الحب باقي
نتحمل المتاعب ونواجه الصعاب
عارفين بقى إمتى نخاف
لو مات الحب فى قلوبنا
لو حل مكانه الخراب
والخراب نتاج الحقد
والبغض والكراهية
وكتير كتير أسباب
لو هتتمكن منا هنضيع مابين الأمم
وهتتقفل فى وشوشنا كل الأبواب
وساعتها لا ينفع لوم
ولا يشفع أى عتاب
مصر باقية طول مالحب باقي
ومعشش دايما فى قلوب الأحباب
بالحب هنعدى المحن
وهنعلى وتعلى بلدنا
بإيدينا وإيدين ولادنا
هى دى الحقيقة هو ده الصواب
بالحب التبر يتخلق من قلب التراب
بالحب الدنيا تخلى من أسباب العذاب
بالحب نقدر نداوى اللى انجرح
واللى عانى واللى انصاب
بالحب مانشيخش أبداً
بالحب نفضل شباب
بالحب الشمس تطلع
وهنزيح الغشاوة
ونزحزح الضباب
بالحب نغلب الحاقدين
بالحب نقهر الخائنين
ونعدى بر الأمان
لا يأثر فينا تآمر ولا يقتلنا إرهاب
وهنرجع زى زمان
ماهو ياما كتير اتصابنا
والحب ماعمروش غاب
دا أكم من جرح استعصى
بالحب طيبناه فطاب.