مشكلات كثيرة تواجهها السيدات والفتيات فى العربة الخاصة بهن فى مترو الأنفاق، وأحاديث فاضت بها الكيل من كثرة ما تعانى منه يومياً فى المترو ولا تجد وسيلة آخرى غيره، واقتراحات لعدد من القوانين التى يحتاجها مترو الأنفاق.
ودخل اليوم السابع إلى عالم عربة السيدات ليعرف من راكبات المترو ماهى القوانين التى يحتاجها مترو الانفاق حتى تخف معاناة المواطنين.
1-مترو كامل للسيدات
وقالت آمال سيد 43 عام "اللى بيحصل فينا فى المترو كل يوم ده حرام، مفيش دين يرضى بكدة، احنا عاوزين مترو كامل للسيدات مش عربية،يارتي حد من المسئولين يجى يشوف بنبقى راكبين فوق بعض زى الغنم، و الحامل بتضرب واللى شايلة عيل ممكن يحصله حاجة مين بس يرضى بكدة".
2-كاميرات مراقبة
بينما قالت سمر محمود 30 سنة " أى بلد فى العالم لازم تحط فى كل عربية كاميرا مراقبة، السواق يقدر يشوف عدد الناس وصل داخل العربية أد ايد، وبناء عليه تذاع تنبيهات فى المحطات اللى بعدها، بتحذر من ركوب الرعبية رقم كذا ورقم كذا، وبالتالى الموضوع هيتنظم".
3-أبواب للصعود و أبواب للنزول
أما سهيلة عبد الله 20 سنة فقالت "ليه ميكونش فى باب للصعود وباب للنزول يفتح كل واحد منهم ويستمر لمدة 3 دقايق، عشان الناس بتطحن بعض وهى طالعة وهى نازلة، ده هيمنع كتير من التصدامات اللى بتحصل والتحرش و الأرف اللى بنشوفه كل يوم".
4-مواعيد ثابتة للمترو
وقالت فتحية محمد 52 سنة "ايه المشكلة لما يبقى فيه مواعيد ثابتة للمترو، كل نص ساعة مثلاً، المترو هيبقى متواجد طول الوقت واللى مركب شده هيركب اللى بعده، الناس هتبقى متطمنة إنها مش هتتأخر، لكن مترو يجى ويفضل التانى اد كدة مش عاوزة يمشى عشان مكيف، محنا طول عمرنا من غير تكييف وكنا راضيين".
5-أماكن محددة للوقوف
وكان لفاطمة محمود 28 سنة وجهة نظر آخرى حيث قالت "عربيات المترو محتاجة تنظيم داخلى، لازم تبقى محددة اماكن للوقوف، واللى معاه كرسى صغير ميحطوش فى أى مكان والسلام، الناس بتبقى واقفة وبتدوس على اللى قاعدين على الأرض".
موضوعات متعلقة:
قبل ما تخوضى التجربة..5 قوانين لازم تعرفيها عن عربة السيدات فى المترو
قبل ما تفكر تركب .. 5 خناقات لن تراها سوى فى عربية السيدات
