سوزان بدوى تكتب: لماذا نحبها؟

تعالوا لنكمل الإجابة عن سؤال طرحناه من قبل عن مصر بلدنا الحبيب، سؤال يتردد فى نفس كلٍ منا-
لماذا نحبها ؟ هذا السؤال الذى تتفاوت الإجابة عليه من شخصٍ إلى آخر، كما أننا قد نجد بيننا من يقول أنا أحبها
بل وأعشقها ولكن لا أعرف لماذا، ولهذا الشخص وغيره أقدم الشعر كوسيلة أعدد فيها محاسنها وأسباباً أخرى تجعلنا نهيم فيها حباً فأقول:
مصر بلد الجدعان
أصحاب الهمة والشهامة
ما يباتش فيها حد جعان
وفاعل الخير لا بيستنى رده
ولا يحس بندامة
مصر للخير عنوان
مصر للجمال علامة
رجالتها رافعين الهامة
ونساها حافظات الكرامة
لو احتجت يوم للسند
تلاقيه حوالينك ياما
مصر محروسة بأهلها
ولا فيش فى الدنيا زيها
وان عشقنا ترابها
ما علينا ملامة

مصر البهية العفية
اللى لابسة البردة والخلخال
فى الصعيد الجواني
منبع الغنوة والموال
واللى لابسة الملاية اللف
والأوية على راسها تزيدها جمال
فى العطفة وفى الحوارى
والحلوة اللى على كتافها الشال
فى الوادى وفى البراري
وفى المدينة فستان وبلوزة وبنطال
وبنت مصر الجميلة
بتسحر العيون فى كل الأحوال
صابرة وحمولة ومهما زادت الحمولة
ومهماالصبر طال
عقلها يزينها وحنيتها تفوق الخيال

مصر الدلتا ووادى النيل
ونخيل قدوده بالهوا تميل
تقبل خدوده السما
يطرح دوا يشفى العليل
مصر النهار الدافى والليل الجميل
مصر السواحل والصحارى والواحة
ولا أجمل منها بكل صراحة
جنة وبنعيشها جيل ورا جيل
مصر حلوة بكنوزها
مصر جميلة بشعبها الأصيل

سليلة الحضارة الفرعونية
شمس الشموس الأفريقية
درة الأرض العربية
أصل الثقافة والفنون
واللى عمرها أبداً ما تهون
تعالوا وشوفوا مجدها
أم الرجال السمر
عمالها وفلاحيها وجندها
واللى كتبوا عالحيطان
تحيا مصر
فى كل عصر وكل أوان
همّ? دول ولادها
مش اللى سبوها
واتمنوا لها الهوان
وقالوا عن جيشها عسكر
وقتلوا ودمروا وحرقوا وفجروا
لا عندهم قلوب ولا حتى عقول تفكر
وإن كانوا كتار
إحنا يا مصر ولادك
واحنا والله أكتر