هيثم طه يكتب: كل انترفيو وأنت طيب !!

أول حاجة بتيجى فى بالى لما افكر هقول إيه فى موضوع الفشل فى الحصول على وظيفة إننا لازم نتأكد إن كل حاجة بتحصل لنا بتحصل لسبب.. افتكر إنى اول ما إتخرجت روحت فى شركه والدى كان شغال فيها ودخلت إنترفيو مع صاحب الشركه سألنى عملت إيه فى حياتك قلت له انا لسه خريج حديث وحكيت له عن انشطه الطلبه الخيريه إللى كنت بعملها فى الجامعه.. إترفضت قال عليا راجل رومانسى بتاع إتحاد طلبه.. سبحان الله.. وانا فى قمة الإحباط جالى تليفون عندك إنترفيو بعد ساعة فى كول سنتر اكبر شركه فى مصر.. قلت للراجل هجيلك حالا.. وفعلا إتقبلت وكانت خطوة وبداية فادتنى جدا جدا فى حياتى ماديا ومعنويا ووظيفيا.

مهم جدا إننا نعرف إن الرفض فى اى إنترفيو لوظيفة دا مش نهايه العالم.. كل دى تجارب هتفيدك وتثقلك وتخليك أقوى.. زى ما بنشبهها ونقول كل إنترفيو بيسن السكينة لحد ما تقطع فى الحتة إلى ربنا كاتب فيها رزق.. كل ميسر لما خلق له.. مستحيل الدكتور هينجح فى إنترفيو مهندس والعكس صحيح
عايزك تاخد الموضوع إيجابيا.. اديك عرفت الشركه وشغلها وفى نفس الوقت مريت بخبره إنترفيو تتعلم منها وشفت الاسئله عامله إزاى علشان تحضر نفسك للإنترفيو الجاى

حصولك على الوظيفة مرتبط جدا إن حضرتك تماثل الصوره الذهنيه المطلوبة عند موظف الإتش ار للوظيفة.. لو ما إتوفقتش..ماتزعلش نفسك.. إنت تستاهل ناس احسن تشتغل معاهم

اخر حاجه مهمه عايز اقولهالك.. بلاش تاخد التجربة السابقة السيئة معاك وإنت رايح إنترفيو جديد.. خد التجربه من اولها..مكان جديد..ناس جديده.. إنترفيو جديد.. ربنا هيكرمك إن شاء الله فيه.