نصر فتحى اللوزى يكتب: النائب ياراجل

* ايه ايييييييييييييييييييييييييييييييه...النائب ياراجل... اللى لما كان يقابلك ايام الانتخابات كنت بتشوف لوزه من ابتسامته الواسعه البرحة... ياراجل اللى كان بيقول انه ابن الدايرة... النائب ياراجل... اللى كان كلامه انه هينصر الغلبان... ويشغل العطلان... ويقضى على الحرمان... النائب ياراجل اللى كان بيوعد بنصرة المظلوم... والمحافظة على الحقوق دا شىء محتوم... النائب ياراجل... اللى كان فاضل عليه هزه ويبوس الايادى... اللى كان بيقول ان كل الشغل الشاغل المعشش فى دماغه هو المصالح العامة... وتحقيق المطالب الشخصية لكل الغلابة والمهمشين... النائب ياراجل اللى كان بيقول هو جاى علشان يبقى خدام لكل المحتاجين علاج وطعام ووظيفة ونضافة الشوارع ومحاربة ارتفاع الاسعار... النائب ياراجل... النائب ياراجل اللى قعدناه تحت القبة فى مجلس النواب... اللى بيتباهى دلوقتى بان المسئولين بيقولوله ( سيادة النائب )... النائب ياراجل اللى دلوقى محدش عارف يوصل لسيادته... واذا وصل بالصدفة لسيادته ميعرفش يتكلم معاه... النائب ياراجل ايه ايييييييييييييييييييييييييييييييييييييييييييه.

أنا مش فاكر النائب ياراجل ده... لأنه مش موجود فى وسطنا وكأنه ملح فص وداب... كانه زى كلام الليل يطلع عليه النهار يسيح... وتحديدا لما نسانا احنا كمان مش فاكرينه... وسلم لى على المترو ياراجل.