افتح فيسبوك بعد فرحى بقد إيه؟ آخر أسئلة "العروسة" على "السوشيال ميديا"

من الطبيعى أن تجد عروس تتساءل عن أماكن لشراء لوازم الزفاف، أو حتى فى مشكلة عاطفية تتعلق بالتعامل مع الزوج ولكن السؤال الذى ربما لم يخطر ببالك أبدًا طرحته إحدى الفتيات على "فيسبوك" وكتبت "البنات اللى اتجوزت المفروض نفتح فيس بوك بعد كام يوم من الفرح؟".

هذا السؤال الذى قابلته الفتيات بالضحك فى البداية أكدت صاحبته مجددًا على أنها تحتاج لإجابة للضرورة، فتوالت الإجابات والاقتراحات...

"بعد ما تروحى"..

رأت بعض الفتيات أنه لا مشكلة فى أن تستخدم العروس "فيسبوك" فى ليلة الزفاف، وكتبت "آلاء" "أنا شخصيًا هرجع من الفرح أفتح فيسبوك علشان أحكى لاصحابى اللى حصل فى الفرح".

أما "سمر" فكتبت "افتحيه يوم الفرح بعد ما تروحى عشان ما تبعديش عن أصحابك كتير، ويقولوا انك اتغيرتى عليهم"، فيما أجابتها "إيمان" بشكل منطقى "يوم الفرح بالليل أكيد هتلاقى العريس نام وانتى مستغربة المكان ومش عارفة تنامى لازم تفتحى فيسبوك. وهتفضلى على الحال دا شوية عن تجربتى".

"تانى يوم"..

وعن تجربتها حكت "هبة" "أنا فتحت فيسبوك تانى يوم، بس اصحابى زعقوا لى وهو كمان قال لى الناس تقول عليا إيه، واصحابى قالوا لى عيب.. نفسى أفهم عيب فى إيه".

أما نرمين فأضافت باستنكار "أنا صاحبتى فتحت فيسبوك تانى يوم الفرح الساعة 7 الصبح كانت فاتحة فيسبوك وعايشة وأنا مقتولة بسبب التعب ونمت".

"فيسبوك إيه؟؟ دى أحلى أيام حياتك"

وبعيدًا عن "الناس هتقول إيه" نصحتها "زهرة": "فيسبوك إيه اللى بتفكرى فيه؟ دى أول أيام الجواز عمرها ما هتتعوض لكن فيسبوك دا موجود فى أى وقت، المفروض تقضى كل لحظة مع حبيبك، لازم تتفقى إنتِ وجوزك إن الفيسبوك ما يتفتحش طول ما انتوا الاتنين مع بعض".

أما بسمة فقالت لها "انتِ مش هتلمسى الموبايل أصلاً لو بتحبى جوزك أول شهور الجواز، أنا عملت كده وماكنتش بحب أكلم حد وبحب أقعد معاه رغم إنى كنت طول الوقت على النت قبل الفرح".

وكان لـ"هند" وجهة نظر أخرى فنصحتها "يابنتى موبايلك شيليه 5 أو 6 أسابيع كده، خليه يختفى من قدام جوزك عشان التقدير وتبينى له إنه أهم من فيسبوك".

موضوعات متعلقة..

عينى ملونة أطلب شبكة كام ؟ "البنت تسأل وفيس بوك يرد: "رخصتى نفسك"

"بابا متجوز على ماما أعمل إيه؟".. "بلغى عنه أو ابتزيه" أغرب الاقتراحات