وهناك عدة أشياء يحتاجها طلاب جامعة القاهرة قبل تطوير ورقة أسئلة الامتحانات كما ذكر نائب رئيس الجامعة.
"عمرو.. الدكاترة بينجحوا الى بيشترى كتبهم"
تتمثل أولى المشاكل التى يواجهها الطلاب فى شراء كتب الأساتذة الجامعيين، فيقول عمرو طالب فى إحدى الفرق بكلية التجارة "الدكاترة بيضغطوا علينا عشان نشترى الكتب بتاعتهم، حتى لو معناش فلوس بنضطر نشتريها عشان ننجح من خوفنا منهم"، وأضاف عمرو أن هذه الكتب الدراسية لم يستفد منها الطلاب فى شئ ففى نهاية العام يتم القاؤها فى القمامة.
"هدير.. الكتب كتيرة جدًا وبتخلينا نمل الحفظ تعبنا"
أما هدير، الطالبة بإحدى الفرق فى كلية الحقوق تقول أنها تشترى كتب كثيرة جدًا وكل كتاب يكون ذو عدد صحف كثيرة، كما أن المقررات الدراسية عليهم تقوم على الحفظ، فالطالب الذى لديه القدرة على الفهم أكثر لن يفلح بهذه المناهج التى يدرسها، مضيفة "جالنا ملل وزهق من الكلية، مبنلحقش نذاكر قبل الامتحان وبننجح بدعى الوالدين".
"فاطمة.. نفسنا منعتمدش على الملازم من بره"
تقول فاطمة طالبة كلية الآداب أنها كانت تريد أن تجتهد فى كلية الآداب لتحصل على تقدير مناسب يؤهلها للعمل فى أماكن مختلفة، إلا أن الملازم التى تباع فى محيط منطقة بين السرايات تسبب لها أزمات، كما تجعلها مشتتة، مضيفة "نفسنا نذاكر من الكتاب الحاجات اللى علينا بس، أغلب الدكاترة بتفرض علينا مقررات هما مشرحوهاش اصلا، احنا بنذاكر واحنا مش فاهمين بنحفظ بس، أفة جامعتنا الحفظ".
"هالة.. مش كل اللى بيذاكر بينجح"
أما هالة، طالبة بكلية الآداب تقول "ميهمناش تعديل أسئلة الامتحان اللى يهمنا فعلا هو وجود ضمان عشان اللى يحل ننجح، مش كل اللى بيحل فى الورقة بينجح فى معايير تانية غير المذاكرة، الدكتور بينجح اللى على مزاجه، ولو قالب على الدفعة كلها احنا ساعتها بنروح فى داهية".
موضوعات متعلقة..
جامعة القاهرة: مواصفات جديدة لورقة الامتحانات تتوافق مع المعايير العالمية
بالصور.. جابر نصار: افتتاح المرحلة الأولى لمستشفى الأمراض المتوطنة خلال أيام
