فيسبوك
واتساب
وحشانى الكلمة الطازة وانتى بتدعيلى
واحشانى البسمة
لمَّا تطبقى منديلى
وف عرق العافية تدوِّب كل خيطانه
وحشانى اللمَّة حواليكي
والبيت بتزغرط جدرانه
وواحشنى الأكل المتلهلب
من صنع إيديكي
وبرام الرز المتعمر والمحشى حمام
ومشلتت فى الفرن يفحفح
وكانونك ما يطير دخَّانه
البيت من غيرك والله
ضاع منُّه أمانه
وحشانى يا أمِّى ومش عارف
على أيه هحكيلك
وحشانى اللمسة من إيدك
وانتى بترقيني
من عين الحاسد والحاقد
وعنيه الصفرا التلاويني
وتحطى سياجى بدعاكى
وتختمى قرآنه
البيت من غيرك والله
ضاع منُّه أمانه
وحشانى يا أمى وف عيدك
ببعت سلامات
والشوق للقاكى خلانى
ضمن الأموات
ومصبَّر قلبى لفراقك
بعض الدعوات
بذكرها تملِّى ف صلواتى
وأبعت رحمات
يجمعنى إلهى ويَّكي
ف أحلى الجنَّات
والنص بيهرب من إيدى
واختل ميزانه
البيت من غيرك والله
ضاع منُّه أمانه
الأم
