نيجيريا.. النداء الأخير لكوبر والذين معه

كالعادة سيبدأ العد التنازلى لمباراة مصر ونيجيريا لقاء الذهاب 25 الجارى، والعودة 29 الجارى برضه ببرج العرب!
المباراة فارقة فى كل حاجة.. وأى حاجة؟!
من ناحية.. بداية لفكرة العودة لأمم أفريقيا فى 2017 بعد غياب 3 دورات!
كمان.. اختبار حقيقى للسيد «كوبر».. صاحب الاسم العالمى، بجد، لأن الخروج يعنى خسارة قريبة!
يا سادة.. فى الكورة.. دائما ما تسمعون صوتا عاليا فى أماكن السفر.. أو قضاء المصالح.. ينادى «النداء الأخير» لكذا.. أو مذا؟!
قلنا فرصة.. نبدأ حوارنا مع كوبر، قبل ما العد التنازلى يتسارع.. ونشوف.. رايحين معاه على فين!!
الخواجة لازم يعرف أن الإعلان عن 5 محترفين والباقى محليون يتكون منهم قائمة الفراعنة لخوض مباراتى الذهاب والإياب أمام نسور نيجيريا ليس هو الحل؟!
طبعا.. الحل، أن يضع الرجل التوليفة المناسبة، والخطة الألمعية، لتكون بداية مشجعة جدا!!
يا سادة فى الكورة.. لابد أن تطالبوا معنا بأن يتخلى مستر كوبر عن معيار ثقة بعض من حوله فى الإبقاء على أسماء بعينها.. وده مش مهم فى الاختيار بمباراتى نيجيريا.. لكنه سيكون المهم.. فيما لو ظهرت عكوسات فى طريق العودة لأمم أفريقيا!
طيب لازم يا أفندم، نكون عارفين قبل السفر بأيام من هم الـ11 لاعب الذين سيبدأون اللقاء؟!
طيب.. أقول لحضرتك ليه؟!
أولا.. الأشقاء السمر فى نيجيريا أكيد يجلسون الآن فى حيرة، لأنهم مروا بالكثير من المشاكل التى أثرت على فريقهم أى جاءوا أخيرا بإدارة فنية جديدة «سياسيا.. وأمونيك»
يا سادة فى الكورة.. كمان لازم نوضح لكوبر إننا لن نغفر له وللجهاز.. أى اهتزاز فى الأداء، بعد كل الصبر اللى ماكانش له حدود، ودايما انتظرنا أن يخرج ما عنده، لإننا مصدقين إنه مدرب عالمى.. أى والله!
إنما اللى بيخوفنا من «العالمى» كوبر إن الفريق الوطنى لا يدار بطريقة عالمية؟
آه فلم نر مباريات قوية!
صح ولم يطالب بفتح الأجندة بتاعت الفيفا؟!
مش كده!
قلنا ماشى يمكن الظروف وكمان شوية عكوسات دايماً توضع فى طريق الكوتش المنتخباوى من رجالة الجبلاية!
يا سادة فى الكورة لازم تكونوا معانا خاصة، ونحن نطالب الخواجة بوضع خطة كفيلة بأن نلعب كورة شجاعة أمام النسور، فهى وحدها ما سيكفل تحقيق أى نتيجة نريدها فى مباراة العودة!
أظن إن كوبر وبعض الذين معه يعرفون هذا جيداً وعملوا فى ظروف مشابهة فى بلاد أخرى!
طيب الناس دى لما تيجى مصر بلدنا إيه اللى بيجرى لها؟!
كويس نقول لحضراتكم فوراً اللى بيقابلوه يروحوا حاطين أمامه لستة بالناس الوحشة!
طبعاُ الوحشين يعنى اللى عايزين نتايج وكورة شجاعة وكدا يعنى!
يا سادة فى الكورة.. لابد أن تكونوا شهودا على العقد الشعبى الذى أرى أنه يجب إعلانه وتوصيل نسخة منه «لكوبر» الذى ينص على ضرورة التأهل، لأنه مش الطريق الوحيد للاطمئنان له.. لأ؟! ده.. هايكون «عربون» بقائه.. ومزيد من الثقة فى أن وجوده ومسيرته الذاتية الدولية جداً قادرة على تحقيق حلم المصريين الغائب من العام 1990، بالوصول لكأس العالم.. مونديال روسيا 2018!
خلينا نشوف.. هايدفع.. ولا؟!
طيب.. ادعوا معى أن يدفع.. ويريحنا!