نفسى أرجع زى زمان
بلا هموم بلا مشاكل بلا أحزان
نفسى أرجع صغير
ولا فى الحياة أعيش متحير
أرجع ألعب فى الميدان
مع اصحابى الجيران
الخسران يبارك الكسبان
والكل يروح فرحان
نتخانق ونتصالح
نضحك نبكى والقلب مسامح
فى الشتا نروح المدرسة
أحلى صحبة كويسه
نقف ونحى العلم
نقرا ونكتب بالقلم
نضحك نلعب ونهزر
نتشاكل شوية ونكشر
ايام كانت مذاكرة وبس
ولا بأى حاجة نحس
نسمع أم كلثوم الساعة خامسة
والقلب يرق بهمسة
تغنى ألف ليلة وليلة
وليلة تجر ليلة
ايام كانت جميلة
والصيف يجى حر
ونسمة حلوة تعدى تمر
نطلع ويا العيلة المصيف
ونقابل ناس تانية نتعرف
تتحول بعدها لصداقة
بالود تبقى أحلى علاقة
ندق الشماسى ونجيب الكراسي
ناكل ذرة على الكورنيش
واحلى من كدة مفيش
نبنى هرم على الشط
نجرى نلعب ونط
نتجمع كل يوم الجمعة
فول وفلافل من عم جمعه
الليل يهل وجماله روعه
يقطع النور نتلم على شمعه
اصحاب تجمعنا اللمة
على القهوة نلعب ضمنة
كانت الحياة رايقة
عايشه الناس مش متضايقة
كبرنا قبل الاوان
شلنا هموم ولا فى الحسبان
تعبنا فى رحلة الحياة
ومشينا طريق بلا اتجاه
حزن - أرشيفية
