حمدى نصر يكتب: يا محروسة قدامك سكة سفر مليانة خطر

لست منجماً ولا أدعى ما هو حرام ومكروه وملعون من التاء للميم.. ماليش فى "التنجيم" أنا ياولداه يادوب بافك الخط فى قراءة بكره ومع هذا شايف يا محروسة إن قدامك دحديرة لابسه عباية سودة تلطميس ومن غير قعر! سكة سفر كانوا بيقولولنا عليها زمان فى الحواديت: السكة اللى تودى ماترجعش !!

حد يصدق ياناس ياهوه مصر أن الأزهر منارة العالم الإسلامى يتم فيها بلا خجل ولا مواربة الإعلان جهاراً نهاراً عن النية لإنشاء حزب للملحدين ؟! لذلك ظهر من يقول: أنا نذرت نفسى لمحاربة الأزهر !!

والأكثر عجباً من يدعى النبوة!!. والأدهى والأمرّ من يدعى الألوهية أبرهة القرن ! الذى يعلنها إنه يبيت النية لهدم الكعبة وكل ده عرفناه من القنوات الفضائية يعنى خلافاً لكل الأنبياء الذين بدأوا دعوتهم سريه !! معلوم..فهم أنبياء القرن الحادى والعشرين لذلك فهم لا يعدون التلفزيون بدعة وكل بدعة ضلالة وكل ضلالة فى النار.. إنهم يعلنون دعوتهم جهراً من خلال أجهزة إعلام تتربع فى كل بيت وعلى كل سمع وقلب !!

ويأتى قبل ذلك من يقول: إن مصر علمانية بالفطرة.. وآخر يقول الحجاب ليس من الإسلام.. ولا داعى أن نأتى بسيرة البحيرى.. وناعوت، والدغيدى، والسبكى إخوان وانتصار ومحمد سعد وأحمد ناجى وعبدة الشيطان الذين يسرحون ويمرحون فى وسط البلد يمارسون كل ماهو ممنوع.

ثم يأتى دور أمناء الشرطة ليصبوا الزيت على الدحديرة لتكون أكثر وأسرع انزلاقا يامحروسة الشد فى ثوبك من كل حتة خوفى عليه يتقطع وتتعرى أكثر من فنانات اليومين دول!! خايف عليكى من النهارده أكتر من بكره، خايف إن عيال الأعادى بكره يجروا وراكى ويزقلوكى بالطوب ويقولوا المهووسة أهى طول ما المبدعين ماحدش بيقولهم اختشوا عيب.!!!

إيه اللى حصل يا محروسة عشان نوصل لدى مواصيل؟!! القيم فى حياتنا بتختفى واحدة ورا الثانية الأمن والأمان وراحة البال والبسمة بتاعت زمان والعيب بقى مش عيب وهو جاى لنا فى الجرايد والسينما والتليفزيون وبيقولوا عليه حرية ابداع عشان كده سكة السفر دحدير من غير قاع مش باين فيها ولا مطلع.. والتمن كلنا حندفع محدش حيقدر يتهرب زى الضرايب وكل اللى هبره على سويسرا يتهرب. !!

يا أولى الأمر كان الله فى عونكم عارف إن المهمة صعبة لكن مصر أهم.