توفيق ميخائيل يكتب: الحب مش بالكلام

كتر الكلام والجو اتملى منه
يا أهل الكلام ارتاحوا وريحونا وكفاية صخب وهمس
ميكروفونات وكاميرات عمالة تنقل كلام
وكتر الكلام لا يخلو من الغلط والهلس
الحب بالكلام أرخص صنوف الحب
كلام معسول تسمعه بالشفاه وبس
والقلب فيه ما فيه مدارى
ورا ستاره تقيلة تخفى وراها عكس
كلام مصاطب محفوظ يتقال بالليل زبدة
يطلع عليه الصبح يسيح م الشمس
وعواجيز فرح قاعدين للسقطة واللاقطة
يتربصوا مين قال ومين عاد ومين عليه الدور للخبص
الحب بين البشر بجد يبقى من سكات
ويبقى لبكره وبعده كما اليوم والأمس
الحب بجد عطاء قبل ما يكون أخذ
زى ربنا ما حبنا وبيحبنا ويدينا كل لحظة درس
الحب انك تدى من غير ماتستنى رد
وربك هو اللى بيكافئ ويراضى كل نفس
الحب للوطن مش أغانى وهتاف وسقف
حب الوطن عمل ولو كان بشادوف وفأس
من طرف واحد تكون محبًا أو محبوبًا فقط لا يساوى شىء
الحب أنك أنت واللى بتحبه كل واحد بالتانى يحس
واحد مش اثنين اللى يهمك يهمه
خاصة بين اللى حياتهم بدأت بعرس